புதுச்சேரி, கேரளா உள்ளிட்ட தென்மாநிலங்களில் களமிறங்க தவெக வியூகம்: 2029-ஐ இலக்காக வைத்து தீவிர திட்டம்!
புதுச்சேரி: தமிழக வெற்றிக் கழகம் (தவெக) தனது அரசியல் செயல்பாடுகளைத் தமிழ்நாடு எல்லைகளைத் தாண்டி புதுச்சேரி, கேரளா மற்றும் தெலுங்கானா உள்ளிட்ட அண்டை மாநிலங்களிலும் விரிவுபடுத்தத் திட்டமிட்டு வருகிறது. இதற்காகக் கட்சியின் கொள்கைகள் மற்றும் களப்பணிகளைப் பிற பிராந்திய மக்களிடம் கொண்டு சேர்க்கும் விரிவான செயல்திட்டங்கள் தற்போது வகுக்கப்பட்டு வருகின்றன.
குறிப்பாக, 2029-ஆம் ஆண்டு நடைபெறவுள்ள நாடாளுமன்றப் பொதுத்தேர்தலை முதன்மை இலக்காகக் கொண்டு தவெக தனது டிஜிட்டல் கட்டமைப்பை தேசிய அளவில் வலுப்படுத்தி வருகிறது. கட்சியின் முக்கிய உரைகள் மற்றும் நிகழ்வுகள் இந்தி, மலையாளம், தெலுங்கு போன்ற பிராந்திய மொழிகளில் மொழிபெயர்க்கப்பட்டு சமூக வலைத்தளங்கள் வாயிலாகப் பிற மாநிலங்களிலும் வேகமாகப் பரப்பப்பட்டு வருகின்றன. இதற்காகப் பிரத்யேக சமூக ஊடகக் குழுக்கள் முழுவீச்சில் இயங்கி வருகின்றன.
தென்மாநிலங்களில் கணிசமான நாடாளுமன்றத் தொகுதிகளைக் கைப்பற்றி, மத்தியில் ஆட்சி அமைக்கும் சூழலில் ஒரு தீர்க்கமான அரசியல் சக்தியாக உருவெடுப்பதே கட்சியின் நீண்டகால வியூகமாகக் கருதப்படுகிறது. அதன் முதல்கட்டமாகப் புதுச்சேரி உள்ளிட்ட அண்டை மாநிலங்களில் அடிமட்டக் கட்டமைப்பை வலுப்படுத்த தவெக தீவிர முனைப்பு காட்டி வருகிறது.
English summary: According to the report, the Tamilaga Vettri Kazhagam (TVK) is planning to expand its political activity beyond Tamil Nadu to Puducherry, Kerala and Telangana, with the 2029 parliamentary election as its main target. It says the party is strengthening its digital set-up nationally and translating key speeches into Hindi, Malayalam and Telugu for social media. Strengthening grassroots structure in Puducherry and neighbouring states is described as a first step in its long-term strategy.
