வில்லியனூர் திருவள்ளுவர் நகரில் 100 ஆண்டுகளாக வசிக்கும் 30 குறவர் குடும்பங்களுக்கு மனைப் பட்டா வழங்கக் கோரி மாவட்ட ஆட்சியரிடம் மனு!

புதுச்சேரி: புதுச்சேரி வில்லியனூர் திருவள்ளுவர் நகரில் சுமார் 100 ஆண்டுகளுக்கும் மேலாகத் தொடர்ந்து வசித்து வரும் இந்து குறவர் சமுதாயத்தைச் சேர்ந்த 30 குடும்பங்களுக்கு உடனடியாக இலவச வீட்டு மனைப் பட்டா வழங்க வேண்டும் என்று வலியுறுத்தி, புதுச்சேரி மாவட்ட ஆட்சியரிடம் இன்று விரிவான கோரிக்கை மனு அளிக்கப்பட்டது.

வில்லியனூர் திருவள்ளுவர் நகர் பகுதியில் பல தலைமுறைகளாக விளிம்புநிலை மக்களான இந்து குறவர் சமுதாய மக்கள் வாழ்ந்து வருகின்றனர். இருப்பினும், இதுவரை அவர்களுக்குச் சொந்தமான வீட்டு மனைக்கான அதிகாரப்பூர்வ பட்டா வழங்கப்படாததால், அரசு வழங்கும் பல்வேறு அடிப்படை வசதிகள், குடியிருப்பு உதவித் திட்டங்கள் மற்றும் நலத்திட்டங்களைப் பெறுவதில் பெரும் சிக்கல்களை எதிர்கொண்டு வருகின்றனர். இந்நிலையில், பல தலைமுறைகளாக வசித்து வரும் தங்களது வாழ்விட உரிமையை உறுதிப்படுத்தக்கோரி மாவட்ட நிர்வாகத்திடம் முறையிடப்பட்டது.

இந்தக் கோரிக்கை மனு அளிக்கும் நிகழ்வில் சமூக ஊடக மைய மாநிலச் செயலாளர் கு. மகிழ்வரசு (எ) சந்தோஷ்குமார், கட்சியின் அமைப்புச் செயலாளர் வ. ஆதவன், தலைமை நிலையச் செயலாளர் அ. எழில்மாறன், வில்லியனூர் மாவட்டச் செயலாளர் அ. தமிழரசன் ஆகியோர் பங்கேற்றனர். மேலும், பழங்குடியின விடுதலை இயக்கத்தின் முன்னாள் மாநிலப் பொருளாளர் ஏழுமலை, வில்லியனூர் மாவட்ட இளஞ்சிறுத்தை எழுச்சி பாசறையின் துணை அமைப்பாளர் சுகுந்தன் மற்றும் திருவள்ளுவர் நகரைச் சேர்ந்த பாதிக்கப்பட்ட குடும்பத்தினர் திரளாகக் கலந்துகொண்டனர்.

நூறாண்டு காலமாக நில உரிமை இன்றி தவித்து வரும் இந்த மக்களுக்கு உடனடியாகப் பட்டா வழங்கி, அவர்களது வாழ்வாதாரப் பாதுகாப்பை உறுதி செய்ய புதுச்சேரி அரசு சிறப்பு கவனம் செலுத்த வேண்டும் என்று மனுவில் வலியுறுத்தப்பட்டுள்ளது. மனுவைப் பெற்றுக்கொண்ட மாவட்ட ஆட்சியர், இதுகுறித்து சம்பந்தப்பட்ட வருவாய்த்துறை அதிகாரிகளிடம் விரிவான கள ஆய்வு மற்றும் பரிசீலனை மேற்கொள்ள உத்தரவிட்டு உரிய நடவடிக்கை எடுப்பதாக உறுதியளித்தார்.