தமிழக இலவச சைக்கிள் டெண்டரில் மெகா முறைகேடு? புதுச்சேரியை விட இருமடங்கு கூடுதல் விலையா? – ஜோஸ் சார்லஸ் மார்ட்டின் பரபரப்பு புகார்!
புதுச்சேரி: தமிழகத்தில் பள்ளி மாணவர்களுக்கு இலவச மிதிவண்டி வழங்கும் திட்டத்திற்கான டெண்டர் நடைமுறைகளில், புதுச்சேரி அரசை விட இருமடங்கு கூடுதல் விலையைக் குறிப்பிட்டு மக்கள் வரிப்பணத்தில் பெருமளவு முறைகேடு அரங்கேற வாய்ப்புள்ளதாக ஜோஸ் சார்லஸ் மார்ட்டின் மிகக் கடுமையான குற்றச்சாட்டை முன்வைத்துள்ளார். இந்த விவகாரம் பொதுவெளியில் பெரும் அதிர்வலைகளை ஏற்படுத்தியுள்ளது.
இதுதொடர்பாக அவர் வெளியிட்டுள்ள பதிவில், தமிழகத்தில் அரசு பள்ளி மாணவர்களுக்கு இலவச சைக்கிள் வழங்குவதற்காகக் கோரப்பட்டுள்ள டெண்டரில், சில குறிப்பிட்ட சைக்கிள் தயாரிப்பு நிறுவனங்கள் அமைச்சர்கள் சிலருடன் ரகசிய உடன்பாட்டில் இயங்கி வருவதாகத் தகவல்கள் வருகின்றன எனத் தெரிவித்துள்ளார். இதன் காரணமாக, புதுச்சேரி மாநிலத்தின் கொள்முதல் விலையை விட இருமடங்கு அதிகமாக, எந்தவித வரியும் இல்லாமல் ஒரு சைக்கிளின் விற்பனை விலையாக ரூ.7,235 என அக்குறிப்பிட்ட நிறுவனங்கள் நிர்ணயித்துள்ளதை அவர் சுட்டிக்காட்டியுள்ளார்.
மேலும் அண்டை மாநிலமான புதுச்சேரியில் அண்மையில் மாணவர்களுக்கான மிதிவண்டிகள் ஒன்று வெறும் ரூ.3,610 என்ற நியாயமான விலையில் கொள்முதல் செய்யப்பட்டுள்ளதை அவர் ஆதாரத்துடன் ஒப்பிட்டுள்ளார். புதுச்சேரி மாநில கொள்முதலை விட, தமிழகத்தில் கூடுதலாக ஒரு தலைக்கவசம் (ஹெல்மெட்) மற்றும் ஒரு குடிநீர் பாட்டில் மட்டுமே மாணவர்களுக்கு வழங்கப்பட உள்ள நிலையில், அதற்காக மட்டுமே இருமடங்கு கூடுதல் தொகையை வழங்கி பொதுமக்களின் வரிப்பணத்தை வீணடிப்பதா என்று அவர் மிகக் காட்டமாக கேள்வி எழுப்பியுள்ளார்.
எனவே, மக்களின் வரிப்பணத்தைக் கொள்ளையடிக்கும் இந்த மெகா ஊழல் முழுமையாக நடைபெறுவதற்கு முன்பாக, அரசுத் தலைமை இதில் உடனடியாகத் தலையிட்டு இந்த முறைகேடான டெண்டரை உடனடியாகத் தடுத்து நிறுத்த வேண்டும் என்றும், இத்தகைய முறைகேடுகளுக்குத் துணைபோகும் ஊழல்வாதிகளை உடனடியாகக் களை எடுக்க வேண்டும் என்றும் அவர் தனது அறிக்கையில் திட்டவட்டமாக வலியுறுத்தியுள்ளார்.
மாணவர்களின் கல்வி மற்றும் நலனை முன்னிறுத்திச் செயல்படுத்தப்படும் அரசு நலத்திட்டங்களில், புதுச்சேரியை விட இருமடங்கு கூடுதல் தொகை கோரப்பட்டு ஊழல் குற்றச்சாட்டுகள் எழுந்துள்ளது சமூக ஆர்வலர்கள் மற்றும் அரசியல் தளங்களில் பெரும் பரபரப்பை ஏற்படுத்தியுள்ளது.
