சென்னை, நவம்பர் 7: முரசு புயலில் சிக்கி உயிரிழந்த காசிமேட்டை சேர்ந்த மீனவர்களின் உடல்கள் மீட்கப்பட்ட நிலையில், சென்னை கொண்டு வரப்பட்ட உடல்களுக்கு மீன்வளத்துறை அமைச்சர் ஸ்ரீநாத் அஞ்சலி செலுத்தினார்.
கடந்த 29 ஆம் தேதி கடலுக்குச் சென்ற காசிமேட்டைச் சேர்ந்த 9 மீனவர்கள் முரசு புயல் பாதிப்பில் சிக்கி மாயமாயினர். அவர்களை மீட்டுத் தரக் கோரி குடும்பத்தினர் காசிமேடு மீன்வளத்துறை அலுவலகத்தில் மூன்று நாட்களாக தொடர் போராட்டத்தில் ஈடுபட்டனர். இந்நிலையில் ஆந்திர மாநிலம் ஓங்கோல், கொத்தப்பட்டினம் உள்ளிட்ட கடற்பகுதிகளில் கரை ஒதுங்கிய ஐந்து மீனவர்களின் உடல்கள் உட்பட மொத்தம் 7 பேரின் உடல்கள் மீட்கப்பட்டு சென்னைக்கு கொண்டு வரப்பட்டன.
ராய்புரம், தண்டையார்பேட்டை, திருவொற்றியூர் பகுதிகளைச் சேர்ந்த விஜயகாந்த், முருகன், குப்புசாமி உள்ளிட்ட உயிரிழந்த மீனவர்களின் உடல்களுக்கு மீன்வளத்துறை அமைச்சர் ஸ்ரீநாத் அஞ்சலி செலுத்திவிட்டு அரசு அறிவித்த நிவாரண உதவியை வழங்கினார். அப்போது மாயமான மீனவர்களை மீட்க உடனடி நடவடிக்கை எடுக்காதது குறித்தும் மூன்று நாட்களாக போராட்டத்தில் ஈடுபட்டவர்களை சந்தித்து பேசாதது குறித்தும் செய்தியாளர்கள் கேள்வி எழுப்பிய நிலையில், அதற்கு பதிலளிக்காமல் அமைச்சர் ஸ்ரீநாத் அமைதி காத்தார்.
இதனிடையே, உயிரிழந்த மீனவர் விஜயகாந்த் உடலுக்கு மரியாதை செலுத்திய திமுக எம்பி கலாநிதி வீராச்சாமி, தாவேகா அரசு ரீல்ஸ் போடுவதில் மட்டுமே ஆர்வம் காட்டுவதாக விமர்சித்தார். மேலும், கரூர் கூட்ட நெரிசலில் உயிரிழந்தவர்கள் குடும்பத்தினருக்கு வழங்கியது போல உயிரிழந்த ஒன்பது மீனவர்களின் குடும்பத்திற்கும் தலா 25 லட்சம் ரூபாய் நிவாரணம் வழங்க வேண்டும் என அவர் வலியுறுத்தினார்.
