திருப்பட்டினம் கீழையூர் ஐயனார் கோயில் கும்பாபிஷேக விழா: முதல்வர் ரங்கசாமியிடம் அழைப்பிதழ் வழங்கப்பட்டது!
புதுச்சேரி: காரைக்கால் மாவட்டம் திருப்பட்டினம் கீழையூரில் அமைந்துள்ள ஸ்ரீ புஷ்கலா அம்பிகா சமேத ஸ்ரீ பொய்யாத மூர்த்தி ஐயனார் திருக்கோயில் கும்பாபிஷேக விழாவிற்கான அழைப்பிதழ் புதுச்சேரி முதலமைச்சர் என். ரங்கசாமியிடம் முறைப்படி நேரில் வழங்கப்பட்டது.
காரைக்கால் பிராந்தியத்தின் வரலாற்றுப் பெருமை வாய்ந்த ஆன்மிகத் தலங்களில் ஒன்றாகத் திகழும் கீழையூர் ஸ்ரீ பொய்யாத மூர்த்தி ஐயனார் திருக்கோயிலில் திருப்பணிகள் முடிவுற்று, விரைவில் மகா கும்பாபிஷேகப் பெருவிழா விமரிசையாக நடைபெறவுள்ளது. இதனையொட்டி, புதுச்சேரி சட்டப்பேரவை வளாகத்தில் முதலமைச்சர் என். ரங்கசாமியை நேரில் சந்தித்து இவ்விழாவிற்கான அழைப்பிதழ் அளிக்கப்பட்டது.
நிரவி – திருப்பட்டினம் சட்டமன்றத் தொகுதி உறுப்பினர் டி.கே.எஸ்.எம். மீனாட்சிசுந்தரம் அவர்களின் முன்னிலையில் நடைபெற்ற இந்நிகழ்வில், கோயில் நிர்வாக அதிகாரி ஜெயக்குமார் மற்றும் முரளி குருக்கள் ஆகியோர் முதலமைச்சருக்குத் திருக்கோயில் பிரசாதங்களை வழங்கி, கும்பாபிஷேக அழைப்பிதழை அளித்து விழாவில் பங்கேற்குமாறு அன்போடு அழைப்பு விடுத்தனர்.
அழைப்பிதழை மகிழ்ச்சியுடன் பெற்றுக்கொண்ட முதலமைச்சர் என். ரங்கசாமி, கும்பாபிஷேக விழா எவ்வித இடையூறுகளுமின்றி சிறப்பாகவும் பக்திப் பெருக்குடனும் நடைபெறத் தனது மனமார்ந்த வாழ்த்துகளைத் தெரிவித்தார். மேலும் காரைக்கால் பிராந்தியத்தில் ஆன்மிக விழாக்களுக்குத் தேவையான பாதுகாப்பு, சுகாதாரம் உள்ளிட்ட அனைத்து அடிப்படை உள்கட்டமைப்பு வசதிகளையும் அரசுத் துறை நிர்வாகங்கள் ஒருங்கிணைந்து மேற்கொள்ள அறிவுறுத்தப்படும் எனவும் உறுதியளித்தார்.
