‘அர்னாப்’ புயல் ருத்ரதாண்டவம்: ஏனாமில் 101 ஹெக்டேர் நெற்பயிர்கள் பாழ்; மின்கம்பங்கள் சரிந்து இயல்பு வாழ்க்கை பாதிப்பு!
புதுச்சேரி, 29/10/2026: புதுச்சேரி மாநிலத்தின் பிராந்தியங்களில் ஒன்றான ஏனாம் பகுதியில் தீவிர ‘அர்னாப்’ புயல் பெரும் சேதத்தை ஏற்படுத்தியுள்ளது. மணிக்கு 125 கி.மீ முதல் 150 கி.மீ வேகத்தில் வீசிய பலத்த சூறாவளிக் காற்றினால் ஏற்பட்ட சேதங்கள் குறித்த முதற்கட்ட மதிப்பீட்டு அறிக்கையை ஏனாம் பிராந்திய நிர்வாக அதிகாரி சிவராஜ் மீனா, புதுச்சேரி மாவட்ட ஆட்சியருக்கு அவசர கடிதம் மூலம் அனுப்பியுள்ளார்.
அந்த அறிக்கையின்படி, ஏனாம் பகுதியில் பயிரிடப்பட்டிருந்த 100 சதவீத நெற்பயிர்களும் (101 ஹெக்டேர்) முற்றிலும் நாசமாகியுள்ளன. மேலும் 20-க்கும் மேற்பட்ட தென்னை மரங்கள் வேரோடு சாய்ந்துள்ளன. கால்நடை பராமரிப்புத் துறையின் கீழ் சுமார் 25 மாட்டுக்கொட்டகைகள் முழுமையாகவும் பகுதியாகவும் சேதமடைந்துள்ளன. வருவாய்த்துறை கணக்கீட்டின்படி சுமார் 60 குடிசை வீடுகள் இடிந்து விழுந்துள்ளன. நல்வாய்ப்பாக மனித உயிரிழப்புகளோ அல்லது கால்நடைகள் உயிரிழப்போ எதுவும் நிகழவில்லை என தெரிவிக்கப்பட்டுள்ளது.
புயலின் தீவிரத்தால் ஏனாம் முழுவதும் 500-க்கும் மேற்பட்ட பிரம்மாண்ட மரங்கள் முறிந்து விழுந்தன. இதனால் 35 உயர்மின்னழுத்த (HT) மின்கம்பங்கள், 25 தாழ்வழுத்த (LT) மின்கம்பங்கள் மற்றும் 2 மின்மாற்றிகள் பலத்த சேதமடைந்தன. சுமார் 15 கி.மீ தூரத்திற்கு மின்கடத்தி கம்பிகள் அறுந்து விழுந்ததால், கடந்த 27-ஆம் தேதி மாலை 4 மணி முதல் துண்டிக்கப்பட்ட மின்சாரம் இன்னும் முழுமையாக சீரமைக்கப்படவில்லை. இணையச் சேவை முற்றிலுமாக முடங்கியுள்ளதுடன், தொலைபேசி இணைப்புகளும் பாதிக்கப்பட்டுள்ளன.
சாலைகளில் விழுந்த மரங்கள் மற்றும் மின் கம்பங்களை அப்புறப்படுத்தும் பணியில் தேசிய பேரிடர் மீட்புப் படை (NDRF), தீயணைப்புத்துறை, பொதுப்பணித்துறை மற்றும் மின்துறை ஊழியர்கள் போர்க்கால அடிப்படையில் ஈடுபட்டுள்ளனர். கடும் சூறாவளி காற்று காரணமாக மீனவர்களின் படகுகளுக்கு ஏற்பட்ட சேதங்களை இன்னும் முழுமையாகக் கணக்கிட முடியவில்லை என்றும், இந்திய வானிலை மைய எச்சரிக்கையின்படி தீவிர கண்காணிப்பு பணிகள் முடுக்கிவிடப்பட்டுள்ளதாகவும் ஏனாம் நிர்வாகம் தெரிவித்துள்ளது.
