ஓஎன்ஜிசி நிறுவனத்தின் தலைமைப் பாதுகாப்பு அதிகாரியாக ஐபிஎஸ் அதிகாரி தீபாலி மசிர்கர் பொறுப்பேற்பு!
புதுடெல்லி: இந்தியாவின் முன்னணி பொதுத்துறை நிறுவனமான எண்ணெய் மற்றும் இயற்கை எரிவாயுக் கழகத்தின் (ONGC) புதிய செயல் இயக்குநர் மற்றும் தலைமைப் பாதுகாப்பு அதிகாரியாக (Executive Director – Chief Security) மூத்த ஐபிஎஸ் அதிகாரி தீபாலி மசிர்கர் பொறுப்பேற்றுக்கொண்டார். இந்நிறுவனத்தின் தலைமைப் பாதுகாப்புப் பணிகளை வழிநடத்தும் நோக்கில் கடந்த அக்டோபர் 28 அன்று அவர் முறைப்படி தனது பொறுப்புகளை ஏற்றுக்கொண்டதாக ஓஎன்ஜிசி நிர்வாகம் அதிகாரப்பூர்வமாகத் தெரிவித்துள்ளது.
2008-ஆம் ஆண்டு பேட்ஜ் நாகாலாந்து பிரிவு ஐபிஎஸ் (IPS) அதிகாரியான தீபாலி மசிர்கர், சட்டம் ஒழுங்கு பராமரிப்பு, பாதுகாப்பு நிர்வாகம் மற்றும் பொதுக் கொள்கை வகுத்தல் ஆகியவற்றில் பரந்த அனுபவம் கொண்டவர் ஆவார். ஹைதராபாத் செயின்ட் பிரான்சிஸ் கல்லூரி, மும்பை பல்கலைக்கழகம் மற்றும் சர்வதேச புகழ்பெற்ற லண்டன் ஸ்கூல் ஆஃப் எகனாமிக்ஸ் (LSE) ஆகியவற்றின் முன்னாள் மாணவியான இவர், அறிவியல் மற்றும் சட்டப் படிப்புகளுடன் சர்வதேச அரசியல் பொருளாதாரத்தில் முதுகலை பொது நிர்வாகப் பட்டமும் பெற்றவர். நாகாலாந்து மாநிலத்தில் துணை காவல் தலைவர் (DIG) அந்தஸ்து வரை பணியாற்றியுள்ள தீபாலி மசிர்கர், மகாராஷ்டிராவில் மும்பை மற்றும் நாக்பூர் நகரங்களில் துணை காவல் ஆணையராகப் (DCP) பணியாற்றி குற்றப் புலனாய்வு, பொருளாதாரக் குற்றங்கள் மற்றும் சைபர் குற்றத் தடுப்புப் பிரிவுகளில் சிறப்பாகச் செயல்பட்டுள்ளார். தொடர்ந்து இந்திய தேர்தல் ஆணையத்தின் இயக்குநராகப் பொறுப்பு வகித்த இவர், தேர்தல் திட்டமிடல் மற்றும் 2024 நாடாளுமன்றப் பொதுத்தேர்தலை வெற்றிகரமாக நடத்துவதில் முக்கிய பங்காற்றினார்.
அண்மையில் மத்திய பழங்குடியினர் விவகாரங்கள் அமைச்சகத்தின் இயக்குநராகப் பணியாற்றிய அனுபவமும் இவருக்கு உண்டு. நிர்வாகத் திறன் மற்றும் பாதுகாப்புத் துறை அனுபவமிக்க தீபாலி மசிர்கர் வருகையானது, நாட்டின் மிக முக்கிய எரிசக்தி கட்டமைப்புகளையும் ஓஎன்ஜிசி நிறுவனத்தின் சொத்துக்களையும் பாதுகாப்பதில் பெரும் பலமாக அமையும் எனத் தெரிவிக்கப்பட்டுள்ளது.
