விஜயதசமி: புதுச்சேரி முத்தியால்பேட்டை லட்சுமி ஹயக்ரீவர் கோவிலில் நெல்மணியில் ‘அ’ எழுதி கல்வி பயிலத் தொடங்கிய மழலைகள்!

புதுச்சேரி, அக். 21: நவராத்திரி விழாவின் நிறைவு நாளான விஜயதசமி பண்டிகையை முன்னிட்டு, புதுச்சேரி முத்தியால்பேட்டையில் உள்ள அருள்மிகு ஸ்ரீ லட்சுமி ஹயக்ரீவர் திருக்கோவிலில் வித்யாரம்பம் நிகழ்ச்சி மிக விமரிசையாக நடைபெற்றது. இந்நாளில் தொடங்கப்படும் எந்த ஒரு நற்காரியமும், குறிப்பாக கல்வி பயிலத் தொடங்குவது பெரும் வெற்றியைத் தரும் என்பது பக்தர்களின் நம்பிக்கையாகும். இதனை முன்னிட்டு, புதுச்சேரியின் பல்வேறு பகுதிகளில் இருந்தும் திரளான பெற்றோர்கள் தங்களின் பச்சிளம் குழந்தைகளை இத்திருக்கோவிலுக்கு அழைத்து வந்தனர்.

அங்கு பரப்பி வைக்கப்பட்டிருந்த நெல்மணிகளில் குழந்தைகளின் விரல்களைப் பிடித்து ‘அ’ என்ற முதல் தமிழ் எழுத்தை எழுத வைத்து கல்விப் பயணத்தை முறைப்படி தொடங்கினர். குழந்தைகளின் கல்வித்திறன், நினைவாற்றல் மற்றும் அறிவு மேன்மையடைய வேண்டி நடத்தப்பட்ட இந்நிகழ்வைத் தொடர்ந்து, கல்விக்கு அதிபதியான அருள்மிகு லட்சுமி ஹயக்ரீவருக்கு சிறப்பு அபிஷேக ஆராதனைகள் மற்றும் மகாதீபாராதனை நடைபெற்றன. இந்த வித்யாரம்பம் உற்சவத்தில் ஏராளமான பெற்றோர்களும் பக்தர்களும் கலந்து கொண்டு சுவாமி தரிசனம் செய்து அருள் பெற்றனர்.

English summary: Vidyarambam was held at the Sri Lakshmi Hayagreevar temple in Muthialpet, Puducherry, on Vijayadasami, the last day of Navaratri. Parents brought young children, whose fingers were guided to write the first Tamil letter in rice grains to begin their education. Special abhishekam and Maha Deeparadhanai followed.