புதுச்சேரியில் பள்ளிகளுக்கு மட்டும் விடுமுறை: பாதியில் இறக்கிவிடப்பட்ட கல்லூரி மாணவர்கள்; அரசுக்குக் கோரிக்கை!
புதுச்சேரி: புதுச்சேரி யூனியன் பிரதேசத்தில் கனமழை காரணமாகப் பள்ளிகளுக்கு மட்டும் விடுமுறை அறிவிக்கப்பட்ட சூழலில், மாணவர்களுக்கான பேருந்துகளில் பயணித்த கல்லூரி மாணவ, மாணவிகள் நடுவழியில் இறக்கிவிடப்பட்டதாக எழுந்துள்ள புகார் பெரும் பரபரப்பையும் அதிருப்தியையும் ஏற்படுத்தியுள்ளது.
புதுச்சேரி மற்றும் அதன் புறநகர்ப் பகுதிகளில் பெய்து வரும் தொடர் கனமழை எதிரொலியாக, முன்னெச்சரிக்கை நடவடிக்கையாகப் பள்ளிகளுக்கு மட்டும் விடுமுறை அளித்து அரசு உத்தரவிட்டது. அதேநேரம் கல்லூரிகள் வழக்கம் போல் இயங்கும் என்று தெரிவிக்கப்பட்டிருந்தது. இந்நிலையில், கிராமப்புறங்கள் மற்றும் புறநகர்ப் பகுதிகளிலிருந்து நகரப் பகுதியில் உள்ள கல்லூரிகளுக்குச் செல்வதற்காக, அரசு இயக்கும் மாணவர்களுக்கான கட்டணமில்லா சிறப்புப் பேருந்துகளில் ஏறிய கல்லூரி மாணவர்களைப் பேருந்து ஊழியர்கள் பாதியிலேயே இறக்கிவிட்டதாகப் புகார்கள் எழுந்துள்ளன.
“பள்ளிகளுக்கு விடுமுறை என்பதால் மாணவர் சிறப்புப் பேருந்துகள் முழுமையாக இயக்கப்படவில்லை அல்லது பள்ளி மாணவர்களுக்கானது” என்ற காரணத்தைக் கூறி நடுவழியில் தங்களை இறக்கிவிட்டதாக மாணவர்கள் குற்றம் சாட்டுகின்றனர். இதனால் குறித்த நேரத்திற்கு கல்லூரிகளுக்குச் செல்ல முடியாமலும், கனமழையில் மாற்றுப் போக்குவரத்து வசதிகள் கிடைக்காமலும் மாணவ, மாணவிகள் மிகுந்த சிரமத்திற்கு ஆளாகினர்.
மழைக்காலங்களில் விடுமுறை அறிவிப்புகளை வெளியிடும் போது கல்வித்துறை மற்றும் அரசு நிர்வாகம் மிகுந்த கவனத்துடன் செயல்பட வேண்டும் என்றும், பள்ளி மற்றும் கல்லூரிகளுக்கு விடுமுறை அறிவிப்பதில் முழுமையான தெளிவுத்தன்மை இருக்க வேண்டும் என்றும் மாணவர்கள் மற்றும் பெற்றோர் தரப்பில் வலியுறுத்தப்பட்டுள்ளது. மேலும், கல்லூரிகள் செயல்படும் நாட்களில் கிராமப்புற கல்லூரி மாணவர்களும் அரசுப் பேருந்துகளில் எவ்வித தடையுமின்றி பயணிக்க உரிய நெறிமுறைகளை வகுக்க வேண்டும் எனவும் கோரிக்கை விடுக்கப்பட்டுள்ளது.
