16 ஆண்டுகாலப் போராட்டத்திற்கு வெற்றி: மதகடிப்பட்டு குருவிக்காரர் இன மக்களுக்கு இலவச மனைப் பட்டா வழங்கினார் முதல்வர் ரங்கசாமி!
புதுச்சேரி: புதுச்சேரி மாநிலம் மதகடிப்பட்டு பகுதியில் வசித்து வரும் பழங்குடியின குருவிக்காரர் சமூகத்தைச் சேர்ந்த 25 குடும்பங்களின் நீண்டகாலக் கோரிக்கையை ஏற்று, அவர்களுக்கு இலவச வீட்டு மனைப் பட்டாக்களை முதலமைச்சர் நா. ரங்கசாமி முறைப்படி வழங்கினார்.
மதகடிப்பட்டு கிராமப் பகுதியில் பல தலைமுறைகளாக வாழ்ந்து வரும் நாடோடி மற்றும் பழங்குடி குருவிக்காரர் இன மக்கள், தங்களின் வாழ்வாதாரத்தை உறுதிசெய்யும் வகையில் இலவச மனைப் பட்டா வழங்க வேண்டும் என கடந்த 16 ஆண்டுகளாகத் தொடர்ந்து வலியுறுத்தி வந்தனர். விடுதலைச் சிறுத்தைகள் கட்சியின் பழங்குடியினர் விடுதலை இயக்கத்தின் முதன்மைச் செயலாளர் தோழர் ஏகாம்பரம் ஒருங்கிணைப்பில், அப்பகுதி மக்கள் பல்வேறு கட்டப் போராட்டங்கள், கவன ஈர்ப்பு ஆர்ப்பாட்டங்கள் மற்றும் கோரிக்கை மனுக்கள் மூலம் தங்களது உரிமைக்காகத் தொடர்ச்சியாகக் குரல் கொடுத்து வந்தனர்.
இந்நிலையில், அம்மக்களின் 16 ஆண்டுகால தொடர் முயற்சி மற்றும் போராட்டத்திற்குத் தீர்வு காணும் வகையில், புதுச்சேரி சட்டப்பேரவை வளாகத்தில் மனைப் பட்டா வழங்கும் நிகழ்ச்சி நடைபெற்றது. இந்நிகழ்வில் மாண்புமிகு முதலமைச்சர் நா. ரங்கசாமி கலந்துகொண்டு, மதகடிப்பட்டு குருவிக்காரர் இனத்தைச் சேர்ந்த 25 குடும்பங்களுக்கு அவர்களின் வாழ்விடத்திற்கான இலவச மனைப் பட்டாக்களைப் பயனாளிகளிடம் நேரடியாக வழங்கினார்.
இந்நிகழ்வில் தொகுதி சட்டமன்ற உறுப்பினர் சாய் ஸ்ரீ சரவணகுமார், நிலப் பதிவேட்டுத் துறை அலுவலர் செந்தில்குமார், விசிக பழங்குடியினர் விடுதலை இயக்க முதன்மைச் செயலாளர் ஏகாம்பரம் உள்ளிட்ட முக்கியப் பிரதிநிதிகளும் அரசு அதிகாரிகளும் கலந்துகொண்டனர். அடிப்படை வாழ்விட உரிமைக்காகப் பல அரசியல் கட்சிகள் மற்றும் சமூக அமைப்புகளின் துணையுடன் நடத்தப்பட்ட நீண்ட நெடிய போராட்டத்திற்குப் பிறகு தற்போது சொந்த மனைக்கான ஆவணம் கிடைத்துள்ளது பயனாளிகள் மத்தியில் பெரும் நெகிழ்ச்சியையும் மகிழ்ச்சியையும் ஏற்படுத்தியுள்ளது.
📸 புகைப்படத் தொகுப்பு (Photo Gallery)
