கிருமாம்பாக்கம் ஏரிக்கரையில் மரக்கன்றுகள் நடும் விழா: பசுமை புதுச்சேரியை உருவாக்க பிரிக்ஸ் வார விழிப்புணர்வு!
புதுச்சேரி: புதுச்சேரி மாநிலத்தின் பசுமைப் பரப்பளவை அதிகரிக்கவும், இயற்கை நீர்நிலைகளைப் பாதுகாக்கவும் அரசு பல்வேறு ஆக்கப்பூர்வமான நடவடிக்கைகளைத் தீவிரமாக முன்னெடுத்து வருகிறது. இதன் ஒரு பகுதியாக, புதுச்சேரி அரசு அறிவியல், தொழில்நுட்பம் மற்றும் சுற்றுச்சூழல் துறை, புதுச்சேரி மாசுக் கட்டுப்பாட்டுக் குழுமம் (PPCC), மாவட்ட ஊரக வளர்ச்சி முகமை மற்றும் அரியாங்குப்பம் வட்டார வளர்ச்சி அலுவலகம் ஆகியவை இணைந்து நடத்திய ஏரிக்கரையில் மரக்கன்றுகள் நடும் விழா கிருமாம்பாக்கத்தில் சிறப்பாக நடைபெற்றது.
புதுச்சேரி முதலமைச்சர் ந. ரங்கசாமியின் நல்லாசியுடன் நடைபெற்ற இந்நிகழ்ச்சிக்கு, ஏம்பலம் தொகுதி சட்டமன்ற உறுப்பினர் இ. மோகன்தாஸ் தலைமை தாங்கி, ஏரிக்கரை நெடுகிலும் மரக்கன்றுகளை நட்டு வைத்து திட்டத்தைத் தொடங்கி வைத்தார். சர்வதேச அளவில் இயற்கை வளங்களைப் பாதுகாக்கவும், சுற்றுச்சூழல் சமநிலையைப் பேணவும் முன்னெடுக்கப்படும் ‘பிரிக்ஸ் நிலையான வாழ்க்கை முறை வாரம் – 2026’ (BRICS Sustainable Lifestyle Week – BSLW) கொண்டாட்டங்களின் ஒரு பகுதியாக இந்த மரக்கன்றுகள் நடும் விழா ஒருங்கிணைக்கப்பட்டது.
இந்நிகழ்ச்சியில் பேசிய சட்டமன்ற உறுப்பினர் இ. மோகன்தாஸ், “நீர்நிலைகளைப் பாதுகாப்பதும், ஏரிக்கரைகளைப் பலப்படுத்துவதும் நமது தலையாய கடமையாகும். ஏரிக்கரைகளில் வேர் ஆழமாகப் பாயும் மரங்களை நடுவதன் மூலம் மண் அரிப்பு தடுக்கப்பட்டு, கரைகள் பலப்படும். அதேநேரத்தில் நிலத்தடி நீர்மட்டம் கணிசமாக உயரவும், தூய்மையான காற்று கிடைக்கவும் இது வழிவகுக்கும். இயற்கையைப் பாதுகாக்கவும், பசுமையான புதுச்சேரியை உருவாக்கவும் ஒவ்வொரு குடிமகனும் மரங்களை வளர்ப்பதை மக்கள் இயக்கமாக முன்னெடுக்க வேண்டும்” என்று குறிப்பிட்டார்.
புதுச்சேரி முழுவதும் சுற்றுச்சூழல் மாசைக் குறைத்து நீர்நிலைகளை மீட்கும் பணிகளில் அரசுத் துறைகள் தொடர்ச்சியாக ஈடுபட்டு வருகின்றன. ‘இயற்கையைப் பாதுகாப்போம், மரங்களை வளர்ப்போம், பசுமையான புதுச்சேரியை உருவாக்குவோம்’ என்ற உயரிய நோக்கத்துடன் நடைபெற்ற இவ்விழாவில், நடப்பட்ட மரக்கன்றுகளைத் தொடர்ந்து முறையாகப் பாதுகாத்து பராமரிப்பதற்கான பணிகளையும் துறை அதிகாரிகள் மற்றும் உள்ளாட்சிப் பிரதிநிதிகள் உறுதி செய்தனர். இந்நிகழ்வில் அரசுத் துறை அதிகாரிகள் மற்றும் பொதுமக்கள் பலர் கலந்துகொண்டனர்.
