புதுச்சேரி பெத்தி செமினார் பள்ளி 2027 முதல் சிபிஎஸ்இ பள்ளியாக மாற்றம்: தாளாளர் அருட்தந்தை ஆரோக்கியராஜ் முக்கிய அறிவிப்பு!
புதுச்சேரி: புதுவையின் கல்வி வரலாற்றில் 183 ஆண்டுகள் பாரம்பரியமிக்க அடையாளமாகத் திகழும் பெத்தி செமினார் மேல்நிலைப் பள்ளி, வரும் 2027-ஆம் ஆண்டு முதல் முக்கிய பாடத்திட்ட மாற்றத்தை எதிர்கொள்ள உள்ளதாக அறிவிக்கப்பட்டுள்ளது.
இது தொடர்பாக பள்ளியின் தாளாளர் அருட்தந்தை ஆரோக்கியராஜ் வெளியிட்டுள்ள அறிவிப்பில், புதுச்சேரி நகரின் மையப்பகுதியான காந்தி வீதியில் அமைந்துள்ள வரலாற்றுச் சிறப்புமிக்க பெத்தி செமினார் முதன்மைப் பள்ளி, வரும் 2027-ஆம் கல்வி ஆண்டு முதல் மத்திய இடைநிலைக் கல்வி வாரிய (CBSE) பாடத்திட்டப் பள்ளியாக அதிகாரப்பூர்வமாக மாற்றப்பட்டு இயங்கும் எனத் தெரிவித்துள்ளார்.
அதேநேரத்தில், பெற்றோர்களின் விருப்பம் மற்றும் பிராந்தியக் கல்வித் தேவைகளைப் பூர்த்தி செய்யும் வகையில், புதுச்சேரி உப்பளம் பகுதியில் செயல்பட்டு வரும் மழலையர் பெத்தி செமினார் பள்ளி வளாகம் வழக்கம் போல் மாநில சமச்சீர் கல்வி பாடத்திட்டத்தின் கீழேயே தொடர்ந்து இயங்கும் என்றும் அவர் தெளிவுபடுத்தியுள்ளார். இதன் மூலம் ஒரே நிர்வாகத்தின் கீழ் மாணவர்களுக்கு இருவேறு தரமான கல்வி வாய்ப்புகள் கிடைக்க வழிவகை செய்யப்பட்டுள்ளது.
தேசிய அளவிலான நீட், ஜேஇஇ உள்ளிட்ட போட்டித் தேர்வுகளில் புதுச்சேரி மாணவர்கள் தேசிய அளவில் சிறந்து விளங்க ஏதுவாகவும், எதிர்கால உலகளாவிய சவால்களை எதிர்கொள்ளும் வகையிலும் இந்த கல்வி மாற்றம் முன்னெடுக்கப்பட்டுள்ளது. 183 ஆண்டுகள் பழமை வாய்ந்த தொன்மையான கல்வி நிறுவனத்தின் இந்த நவீன மாற்ற அறிவிப்பு, புதுச்சேரி மக்கள் மற்றும் பெற்றோர்கள் மத்தியில் பெரும் வரவேற்பைப் பெற்றுள்ளது.
English summary: Rev. Fr. Arokiyaraj, correspondent of Puducherry’s 183-year-old Petit Seminaire school, announced that the main school on Gandhi Street will become a CBSE-curriculum school from the 2027 academic year. He said the kindergarten campus at Uppalam will continue under the State Samacheer Kalvi syllabus. The change is intended to help students in national exams such as NEET and JEE.
