புதுச்சேரி இமாகுலேட் பள்ளியில் 381 மாணவிகளுக்கு இலவச மிதிவண்டி: எம்.எல்.ஏ அன்பழகன் வழங்கினார்!
புதுச்சேரி:
புதுச்சேரி அரசு சமூக நலத்துறை சார்பில் செயல்படுத்தப்பட்டு வரும் காமராஜர் இலவச மிதிவண்டி வழங்கும் திட்டத்தின் கீழ், உப்பளம் டாக்டர் அம்பேத்கர் சாலையில் அமைந்துள்ள இமாகுலேட் பெண்கள் மேல்நிலைப் பள்ளியில் பயிலும் மாணவிகளுக்கு இலவச மிதிவண்டிகள் வழங்கும் விழா சிறப்பாக நடைபெற்றது.
இப்பள்ளியில் கடந்த 2025-2026 ஆம் கல்வியாண்டில் ஒன்பதாம் வகுப்பு பயின்ற 381 மாணவிகளுக்கு இலவச மிதிவண்டிகள் வழங்கப்பட்டன. இந்த விழாவில் உப்பளம் சட்டமன்ற தொகுதி உறுப்பினரும், தற்காலிக சட்டப்பேரவைத் தலைவருமான அன்பழகன் சிறப்பு விருந்தினராகக் கலந்துகொண்டு, மாணவிகளுக்கு மிதிவண்டிகளை முறைப்படி வழங்கி வாழ்த்து தெரிவித்தார்.
நிகழ்ச்சியில் சட்டமன்ற உறுப்பினர் அன்பழகன் பேசுகையில், பள்ளி மாணவிகள் கல்வி கற்பதற்குத் தூரமும் போக்குவரத்துப் பிரச்னைகளும் தடையாக இருந்துவிடக்கூடாது என்பதற்காகவே அரசு இத்திட்டத்தைச் சிறப்புடன் செயல்படுத்தி வருகிறது என்று குறிப்பிட்டார். மாணவிகள் தங்களுக்குக் கிடைக்கும் இதுபோன்ற அரசு நலத்திட்ட உதவிகளைச் சரியாகப் பயன்படுத்தி, படிப்பில் கூடுதல் கவனம் செலுத்தி வாழ்க்கையில் உயர்ந்த நிலையை அடைய வேண்டும் என்றும் அவர் கேட்டுக்கொண்டார்.
இவ்விழாவில் பள்ளி முதல்வர் ஜான்ஹில்டா, சிஸ்டர் ஜான்சி, பள்ளி ஆசிரியர்கள், மாணவிகளின் பெற்றோர்கள் மற்றும் பள்ளி மாணவிகள் என ஏராளமானோர் திரளாகக் கலந்துகொண்டனர். இலவச மிதிவண்டிகளைப் பெற்றுக்கொண்ட மாணவிகள் புதுச்சேரி அரசுக்கும், பள்ளி நிர்வாகத்திற்கும் தங்களது மனமார்ந்த நன்றியைத் தெரிவித்தனர்.
புதுச்சேரி யூனியன் பிரதேசத்தில் மாணவ, மாணவிகளின் கல்வி இடைநிற்றலைத் தவிர்க்கவும், பெண்கல்வியை ஊக்குவிக்கவும் சமூக நலத்துறை மூலம் இத்தகைய திட்டங்கள் தொடர்ந்து முன்னெடுக்கப்பட்டு வருவது பொதுமக்களிடையே பெரும் வரவேற்பைப் பெற்றுள்ளது.
