வில்லியனூர் ஜி.என்.பாளையம் பேட் முத்து மாரியம்மன் கோவில் திருப்பணி: காசோலையை பொதுமக்களிடம் வழங்கினார் எம்.எல்.ஏ. ப.ரவிக்குமார்!
புதுச்சேரி: வில்லியனூர் சட்டமன்ற தொகுதிக்குட்பட்ட ஜி.என்.பாளையம் பேட் பகுதியில் அமைந்துள்ள பிரசித்தி பெற்ற அருள்மிகு ஸ்ரீ குழந்தை முத்து மாரியம்மன் ஆலய திருப்பணி செலவிற்கான அரசு நிதியுதவி காசோலையை தொகுதி சட்டமன்ற உறுப்பினர் ப. ரவிக்குமார் பொதுமக்களிடம் நேரில் வழங்கினார்.
வில்லியனூர் தொகுதிக்குட்பட்ட கிராமப்புற பகுதிகளில் உள்ள பழமையான வழிபாட்டுத் தலங்களைப் புனரமைத்து திருப்பணிகளை மேற்கொள்வதற்கும், குடமுழுக்கு விழாக்களை நடத்துவதற்கும் அரசு மற்றும் தொகுதி மேம்பாட்டுத் திட்டங்கள் வாயிலாக பல்வேறு நடவடிக்கைகள் முன்னெடுக்கப்பட்டு வருகின்றன. அந்த வகையில், ஜி.என்.பாளையம் பேட் பகுதியில் உள்ள அருள்மிகு ஸ்ரீ குழந்தை முத்து மாரியம்மன் கோவிலில் திருப்பணிகள் மேற்கொள்ள அப்பகுதி மக்கள் மற்றும் கோவில் நிர்வாகிகள் சார்பில் நிதியுதவி கோரப்பட்டிருந்தது.
இதனையேற்று, இக்கோவிலின் திருப்பணி பணிகளுக்காக அரசு சார்பில் நிதி ஒதுக்கீடு செய்யப்பட்டு அதற்கான காசோலை பெறப்பட்டது. இக்காசோலையினை வில்லியனூர் தொகுதி சட்டமன்ற உறுப்பினர் ப. ரவிக்குமார் முறைப்படி பெற்றுக்கொண்டார். அதனைத் தொடர்ந்து, ஜி.என்.பாளையம் பேட் பகுதிக்கு நேரில் வருகை தந்த அவர், ஊர் பொதுமக்கள் மற்றும் கோவில் திருப்பணி நிர்வாகக் குழுவினரிடம் ஆலய திருப்பணி செலவிற்கான காசோலையினை முறைப்படி ஒப்படைத்தார்.
இந்நிகழ்ச்சியின் போது அப்பகுதியைச் சேர்ந்த ஊர் பொதுமக்கள், முக்கியப் பிரமுகர்கள் மற்றும் கோவில் நிர்வாகிகள் பலர் திரளாக உடனிருந்தனர். கோவில் திருப்பணிகளை தொய்வின்றி துரிதமாக நிறைவேற்ற நிதி உதவி கிடைக்கச் செய்த புதுச்சேரி முதலமைச்சர் என். ரங்கசாமி, அமைச்சர் பி. ராஜவேலு மற்றும் தொகுதி சட்டமன்ற உறுப்பினர் ப. ரவிக்குமார் ஆகியோருக்கு கிராம பொதுமக்கள் மற்றும் பக்தர்கள் சார்பில் நெஞ்சார்ந்த நன்றிகள் தெரிவிக்கப்பட்டன.
