காமராஜ் நகரில் டி-மார்ட் கட்டுமானப் பணி: குடியிருப்புவாசிகளின் பாதுகாப்பு குறித்து ஆட்சியர் குலோத்துங்கனிடம் முறையீடு!

புதுச்சேரி:

புதுச்சேரி காமராஜ் நகர் தொகுதியில் அமையவுள்ள பிரபல வணிக நிறுவனமான ‘டி-மார்ட்’ (DMart) கட்டிடக் கட்டுமானப் பணிகள் தீவிரமாக நடைபெற்று வருகின்றன. இந்நிலையில், இப்பணிகளால் அப்பகுதியில் உள்ள குடியிருப்புகளுக்கும், பொதுமக்களுக்கும் எவ்விதப் பாதிப்பும் பாதுகாப்பு அச்சுறுத்தலும் ஏற்படக்கூடாது என்பதை வலியுறுத்தி, மாவட்ட ஆட்சியர் ஏ.குலோத்துங்கனை நேரில் சந்தித்து விரிவான ஆலோசனைக் கூட்டம் நடத்தப்பட்டது.

காமராஜ் நகர் குடியிருப்புப் பகுதியின் மையத்தில் நடைபெறும் இந்த பிரம்மாண்ட வணிக வளாகக் கட்டுமானத்தின்போது, அப்பகுதியில் வசிக்கும் பொதுமக்களின் அன்றாட வாழ்விற்கு எவ்வித இடையூறுகளோ அல்லது அசம்பாவிதங்களோ ஏற்படாதவாறு முன்னெச்சரிக்கை நடவடிக்கைகளை மாவட்ட நிர்வாகம் போர்க்கால அடிப்படையில் எடுக்க வேண்டும் என கூட்டத்தில் கேட்டுக்கொள்ளப்பட்டது.

குறிப்பாக, கட்டுமானப் பணிகளால் ஏற்படக்கூடிய தொழில்நுட்பக் குறைபாடுகள் மற்றும் அதனால் எழக்கூடிய ஆபத்துகள் குறித்து விவாதிக்கப்பட்டது. இதற்காக, அப்பகுதியைச் சேர்ந்த தொழில்நுட்ப அறிவு கொண்ட குடியிருப்புவாசி ஒருவரும் இந்த ஆலோசனைக் கூட்டத்தில் பங்கேற்க வைக்கப்பட்டார். அவர் மூலமாக, அஸ்திவாரம் மற்றும் கட்டுமான அமைப்பில் உள்ள சிக்கல்கள், கவலைக்குரிய அம்சங்கள் ஆட்சியரின் கவனத்திற்கு ஆதாரங்களுடன் கொண்டு செல்லப்பட்டன.

குடியிருப்புவாசிகளின் பாதுகாப்பு சார்ந்த புகார்கள் மற்றும் தொழில்நுட்பக் கருத்துக்களை முழுமையாகக் கேட்டறிந்த மாவட்ட ஆட்சியர் குலோத்துங்கன், இவ்விவகாரத்தை உரிய வல்லுநர்கள் மூலம் ஆய்வு செய்து, பொதுமக்களுக்கு எவ்விதப் பாதிப்பும் இல்லாதவாறு தகுந்த நடவடிக்கை எடுக்கப் பரிசீலிப்பதாக உறுதியளித்துள்ளார்.

இந்த ஆலோசனைக் கூட்டத்தில் எல்.ஜே.கே (LJK) நிர்வாகப் பொதுச்செயலாளர் ராம் குமார், பொதுச்செயலாளர் டாக்டர் துரைசாமி மற்றும் முக்கிய நிர்வாகிகள் பலரும் உடனிருந்து குடியிருப்புவாசிகளின் உரிமைகளுக்காகவும் பாதுகாப்புக்காகவும் குரல் கொடுத்தனர்.