புதுச்சேரியில் 115 இளநிலை எழுத்தர்களுக்குப் பணி நியமன ஆணை: துணைநிலை ஆளுநர், முதலமைச்சர் நேரில் வழங்கி வாழ்த்து!
புதுச்சேரி: புதுச்சேரி அரசுப் பணியாளர் மற்றும் நிர்வாக சீர்திருத்தத் துறையின் கீழ் இளநிலை எழுத்தர் (Junior Clerk) பணியிடங்களுக்கான நேரடி நியமன எழுத்துத் தேர்வில் தேர்ச்சி பெற்ற 115 பேருக்குப் பணி நியமன ஆணைகள் இன்று அதிகாரப்பூர்வமாக வழங்கப்பட்டன.
புதுச்சேரி பெருந்தலைவர் காமராஜர் மணிமண்டபத்தில் இதற்கான சிறப்பு விழா இன்று எழுச்சியுடன் நடைபெற்றது. விழாவில், துணைநிலை ஆளுநர் கே. கைலாஷ்நாதன் மற்றும் முதலமைச்சர் என். ரங்கசாமி ஆகியோர் கலந்துகொண்டு, அரசுப் பணிக்குத் தேர்வு செய்யப்பட்டுள்ள 115 பேருக்கும் பணி நியமன ஆணைகளை நேரில் வழங்கித் தங்களது வாழ்த்துகளைத் தெரிவித்தனர்.
நேரடி நியமன எழுத்துத் தேர்வு மூலமாக தகுதி பெற்றுள்ள 115 இளநிலை எழுத்தர்களில் 59 ஆண்களும், 56 பெண்களும் அடங்குவர். பெண்களும் ஆண்களும் சரிசம அளவில் அரசுப் பணிகளில் தேர்வாகி சாதனை படைத்துள்ளது குறிப்பிடத்தக்கது. தேர்வு பெற்ற இளநிலை எழுத்தர்கள் புதுச்சேரி அரசின் பல்வேறு துறைகளில் காலியாக உள்ள பணியிடங்களில் உடனடியாகப் பணியமர்த்தப்பட உள்ளனர்.
அரசு நிர்வாகத்தை மேலும் செழுமைப்படுத்தவும், அரசு அலுவலகங்களில் பணிகளை துரிதப்படுத்தி பொதுமக்களுக்குரிய திட்டங்கள் மற்றும் சேவைகளை விரைந்து கொண்டு சேர்க்கவும் இந்த புதிய நியமனங்கள் பெரிதும் உதவும் என தெரிவிக்கப்பட்டுள்ளது. தகுதி அடிப்படையில் அரசுப் பணிகளை வழங்கி இளைஞர்களின் எதிர்காலத்தை உறுதி செய்வதில் புதுச்சேரி அரசு உறுதியாகச் செயல்பட்டு வருகிறது.
இந்நிகழ்ச்சியில் சட்டப்பேரவை தற்காலிக தலைவர் அன்பழகன், சட்டமன்ற உறுப்பினர் செந்தில் (எ) ரமேஷ், புதுச்சேரி அரசு தலைமைச் செயலர் சரத் சவுகான் உள்ளிட்ட அரசு உயர் அதிகாரிகளும், அரசுத் துறைப் பணியாளர்களும், பணி நியமனம் பெற்றவர்களின் பெற்றோரும் பெருமளவில் கலந்து கொண்டனர்.
English summary: Appointment orders were handed over to 115 newly selected Junior Clerks, 59 men and 56 women, at the Perunthalaivar Kamarajar Manimandapam in Puducherry. Lieutenant Governor K. Kailashnathan and Chief Minister N. Rangasamy presented the orders, and the clerks are to be posted to vacancies in various departments. Pro-tem Speaker Anbazhagan, MLA Senthil alias Ramesh and Chief Secretary Sarat Chauhan attended.
