புதுச்சேரி தட்டாஞ்சாவடி தொகுதி இடைத்தேர்தல்: காலை 9 மணி நிலவரப்படி 19.20% வாக்குகள் பதிவு!
புதுச்சேரி: புதுச்சேரி தட்டாஞ்சாவடி சட்டமன்றத் தொகுதி இடைத்தேர்தலுக்கான வாக்குப்பதிவு இன்று காலை தொடங்கி விறுவிறுப்பாக நடைபெற்று வரும் நிலையில், காலை 9:00 மணி நிலவரப்படி 19.20 சதவீத வாக்குகள் பதிவாகியுள்ளதாகத் தேர்தல் துறை அதிகாரிகள் தெரிவித்துள்ளனர்.
தட்டாஞ்சாவடி தொகுதியில் உள்ள வாக்குச்சாவடி மையங்களில் இன்று காலை 7:00 மணிக்கே வாக்குப்பதிவு முறைப்படி தொடங்கியது. வாக்குப்பதிவு தொடங்கிய காலை முதலே பொதுமக்கள், பெண்கள், முதியவர்கள் மற்றும் முதல்முறை வாக்களிக்க வந்த இளம் வாக்காளர்கள் நீண்ட வரிசையில் ஆர்வத்துடன் காத்திருந்து தங்களது ஜனநாயகக் கடமையை ஆற்றி வருகின்றனர். வாக்காளர்களுக்குத் தேவையான குடிநீர், பந்தல் மற்றும் மாற்றுத்திறனாளிகளுக்கான சக்கர நாற்காலி உள்ளிட்ட அனைத்து அடிப்படை வசதிகளும் வாக்குச்சாவடிகளில் சிறப்பாகச் செய்யப்பட்டுள்ளன.
தொகுதி முழுவதும் அமைதியான முறையில் வாக்குப்பதிவு நடைபெறுவதை உறுதி செய்யும் வகையில் பலத்த போலீஸ் பாதுகாப்பு போடப்பட்டுள்ளது. பதற்றமான வாக்குச்சாவடிகளில் மத்திய துணை ராணுவப் படையினரும், புதுச்சேரி காவல்துறையினரும் தீவிரக் கண்காணிப்பில் ஈடுபட்டுள்ளனர். மேலும், வாக்குச்சாவடி மையங்களின் செயல்பாடுகள் வெப்காஸ்டிங் மூலம் தேர்தல் அதிகாரிகளால் தொடர்ந்து கண்காணிக்கப்பட்டு வருகின்றன.
முன்னதாக, இத்தொகுதியில் போட்டியிடும் என்.ஆர்.காங்கிரஸ் வேட்பாளர் அசோக் ஆனந்த் உள்ளிட்ட அரசியல் பிரமுகர்கள் காலையிலேயே வாக்குச்சாவடிக்கு வருகை தந்து தங்களது வாக்குகளைப் பதிவு செய்தனர். காலை நேரத்திலேயே வாக்காளர்கள் கணிசமாக வந்ததால் 9 மணி நிலவரப்படி வாக்குப்பதிவு 19.20 சதவீதமாக உயர்ந்துள்ளது. நண்பகல் மற்றும் மாலை வேளைகளில் வாக்குப்பதிவு மேலும் அதிகரிக்கும் என எதிர்பார்க்கப்படுகிறது.
