புதுச்சேரி வாக்காளர் பட்டியலில் விடுபட்டோரைச் சேர்க்க சிறப்பு இயக்கம்: தலைமைத் தேர்தல் அதிகாரி அறிவிப்பு!
புதுச்சேரி, அக். 08:
புதுச்சேரி யூனியன் பிரதேசத்தில் வாக்காளர் பட்டியல் சிறப்பு தீவிர திருத்தப் பணியின்போது விடுபட்ட தகுதியான நபர்களின் பெயர்களை வாக்காளர் பட்டியலில் சேர்ப்பதற்கான பிரத்யேக சிறப்பு இயக்கம் தொடங்கப்பட்டுள்ளதாகத் தலைமைத் தேர்தல் அதிகாரி ரவிபிரகாஷ் தெரிவித்துள்ளார்.
இந்தியத் தேர்தல் ஆணையத்தின் உத்தரவின்படி, வாக்காளர் பட்டியல் சிறப்பு தீவிர திருத்தம் (எஸ்.ஐ.ஆர்) நிறைவடைந்துள்ள மாநிலங்கள் மற்றும் யூனியன் பிரதேசங்களில் இந்த நடவடிக்கை முன்னெடுக்கப்பட்டு வருகிறது. திருத்தப் பணியின்போதோ அல்லது அதற்குப் பின்னரோ தகுதியிருந்தும் வாக்காளர் பட்டியலில் பெயர் விடுபட்ட நபர்களைக் கண்டறிந்து, அவர்களைப் பட்டியலில் இணைப்பதே இந்த இயக்கத்தின் முக்கிய நோக்கமாகும். இதற்காகத் தலைமைத் தேர்தல் அதிகாரிகள், மாவட்டத் தேர்தல் அதிகாரிகள் மற்றும் வாக்காளர் பதிவு அதிகாரிகளுக்கு விரிவான வழிகாட்டுதல்கள் வழங்கப்பட்டுள்ளன.
அதன்படி, புதுச்சேரி யூனியன் பிரதேசத்தில் உள்ள அனைத்துத் தகுதியான நபர்களையும் கண்டறிந்து வாக்காளர் பட்டியலில் சேர்ப்பதற்காகத் தலைமைத் தேர்தல் அதிகாரி அலுவலகம் சார்பில் சிறப்பு நடவடிக்கைகள் முடுக்கிவிடப்பட்டுள்ளன. தகுதியுள்ள எந்தவொரு குடிமகனும் வாக்களிக்கும் உரிமையை இழந்துவிடக் கூடாது என்பதில் தேர்தல் நிர்வாகம் முனைப்புடன் செயல்பட்டு வருகிறது.
இந்தச் சிறப்பு இயக்கத்தின் முக்கியப் பகுதியாக, வாக்குச்சாவடி நிலை அலுவலர்கள் (BLO) களப்பணியில் ஈடுபடுத்தப்படுகின்றனர். தீவிர திருத்தப் பணியின்போது தயாரிக்கப்பட்ட முகவரியில் இல்லாதோர், நிரந்தரமாக இடம்பெயர்ந்தோர் மற்றும் இறந்தோர் பட்டியலை எடுத்துக்கொண்டு, வாக்குச்சாவடி நிலை அலுவலர்கள் வீடு வீடாகச் சென்று முன்னுரிமை அடிப்படையில் நேரில் சரிபார்க்க அறிவுறுத்தப்பட்டுள்ளனர்.
இத்தகைய மறுசரிபார்ப்பின்போது, முகவரியில் இல்லாதோர் அல்லது இடம்பெயர்ந்தோர் பட்டியலில் உள்ள ஒருவர் உண்மையில் அதே முகவரியில் வசித்து வரும் தகுதியான வாக்காளர் என்பது தெரியவந்தால், அவரது பெயரை வாக்காளர் பட்டியலில் உடனடியாகச் சேர்க்க நடவடிக்கை எடுக்கப்படும். நடைமுறையில் உள்ள தொடர் வாக்காளர் பட்டியல் புதுப்பிப்பு முறையின்படி, உரிய படிவம் 6 சமர்ப்பிக்க வாக்காளர்களுக்கு வாக்குச்சாவடி நிலை அலுவலர்களே தகுந்த உதவிகளை வழங்குவர்.
புதுச்சேரி முழுவதும் வாக்குச்சாவடி நிலை அலுவலர்களால் மேற்கொள்ளப்படும் இந்த வீடு வீடான மறுசரிபார்ப்புப் பணிகள் முன்னுரிமை அடிப்படையில் தீவிரமாக நடைபெற்று வருகின்றன. இப்பணிகள் அனைத்தும் வரும் அக்டோபர் 17-ஆம் தேதிக்குள் முழுமையாக நிறைவு செய்யப்படும் என்று தலைமைத் தேர்தல் அதிகாரி அலுவலகம் வெளியிட்டுள்ள செய்திக் குறிப்பில் தெரிவிக்கப்பட்டுள்ளது.
