அயோடின் பற்றாக்குறை இல்லாத சமூகத்தை உருவாக்க மக்கள் இயக்கம் தேவை: உணவு மற்றும் சுகாதாரத்துறை இணைந்து நடவடிக்கை

சென்னை: உலக அயோடின் பற்றாக்குறை குறைபாடுகள் தடுப்பு தினத்தை முன்னிட்டு, பொதுமக்களிடையே போதிய விழிப்புணர்வை ஏற்படுத்தி ஊட்டச்சத்து குறைபாடற்ற சமுதாயத்தை உருவாக்கும் விரிவான விழிப்புணர்வு கருத்தரங்கம் மற்றும் உறுதிமொழி ஏற்கும் நிகழ்ச்சி சென்னை ஜஸ்டிஸ் பஷீர் அஹ்மத் சையீத் மகளிர் கல்லூரியில் (JBAS) சிறப்பாக நடைபெற்றது. இந்நிகழ்வில் அரசுத் துறை உயரதிகாரிகள், அமைச்சர்கள் மற்றும் கல்லூரி மாணவிகள் திரளாகப் பங்கேற்றனர்.

மனித உடலின் வளர்ச்சி மற்றும் ஆரோக்கியமான வாழ்வுக்கு அயோடின் அத்தியாவசிய தாது உப்பாக விளங்குகிறது. இந்த விழிப்புணர்வு கூட்டத்தில் பேசிய துறை சார்ந்த வல்லுநர்கள், உடலில் அயோடின் பற்றாக்குறை ஏற்படுவதால் ஏற்படும் பேராபத்துகள் குறித்து விரிவாக எடுத்துரைத்தனர். குறிப்பாக, அயோடின் பற்றாக்குறையானது உடல் வளர்ச்சி, மூளை வளர்ச்சி, அறிவாற்றல் மற்றும் நினைவாற்றல் திறனை கடுமையாகப் பாதிக்கிறது. அதேபோன்று, கர்ப்பிணிப் பெண்களுக்கு அயோடின் குறைபாடு ஏற்படும் சூழலில் கருச்சிதைவு ஏற்படுதல், குழந்தைகள் இறந்து பிறத்தல் மற்றும் பிறக்கும் குழந்தைகளுக்கு நிரந்தர மூளை வளர்ச்சி குறைபாடுகள் ஏற்படுவது போன்ற மீள முடியாத பாதிப்புகள் உருவாகின்றன என எச்சரிக்கப்பட்டது.

இந்த விழிப்புணர்வு நிகழ்வின் தொடர்ச்சியாக, ஒவ்வொரு குடும்பத்திலும் தினசரி பயன்பாட்டில் தரமான அயோடின் கலந்த உப்பை மட்டுமே பயன்படுத்த வேண்டும் என்பதை வலியுறுத்தி கல்லூரி மாணவிகளுடன் இணைந்து விழிப்புணர்வு உறுதிமொழி ஏற்கப்பட்டது. மேலும், இது தொடர்பாக மாணவிகளுக்கு இடையே நடத்தப்பட்ட விழிப்புணர்வு போட்டிகளில் வெற்றி பெற்ற மாணவியருக்குப் பாராட்டுகள் தெரிவிக்கப்பட்டு சிறப்புப் பரிசுகள் வழங்கப்பட்டன.

நிகழ்ச்சியில் முக்கிய உரையாற்றியபோது, அயோடின் விழிப்புணர்வை மக்களிடம் சேர்க்கும் கட்டமைப்பு குறித்து விரிவாக விவரிக்கப்பட்டது. தமிழகத்தின் பொது விநியோகத் திட்டத்தின் கீழ் இயங்கும் நியாய விலைக் கடைகளின் வலுவான வலைப்பின்னல் மற்றும் நுகர்வோர் பாதுகாப்பு அமைப்புகள் மூலம் தரமான அயோடின் உப்பை அடித்தட்டு மக்களின் வீடு தேடி கொண்டு சேர்ப்பது அரசின் மிகப்பெரிய பலமாக உள்ளது. சுகாதாரத் துறையும் உணவுத் துறையும் ஒருங்கிணைந்து செயல்படுவதன் மூலமே இக்குறைபாட்டை முழுமையாக ஒழிக்க முடியும் என கூட்டத்தில் சுட்டிக்காட்டப்பட்டது.

தற்கால நவீன தகவல் தொழில்நுட்பக் காலத்தில் விழிப்புணர்வை இளைஞர்கள் மூலம் தீவிரப்படுத்த மாணவிகளுக்கு ஒரு முக்கிய அறைகூவல் விடுக்கப்பட்டது. மாணவிகள் அனைவரும் தங்களது வீடுகளில் சமையலுக்குப் பயன்படுத்தப்படும் உப்பில் போதுமான அயோடின் உள்ளதா என்பதை உடனடியாகப் பரிசோதித்து, அது குறித்த விழிப்புணர்வு பதிவுகளை இன்ஸ்டாகிராம் ரீல்ஸ்களாக (Reels) பதிவிட்டு மாண்புமிகு முதலமைச்சருக்கு டேக் செய்ய வேண்டும் என்றும், இதன் மூலம் அயோடின் விழிப்புணர்வை ஒரு பெரும் மக்கள் இயக்கமாக மாற்ற வேண்டும் என்றும் மாணவிகள் கேட்டுக்கொள்ளப்பட்டனர்.

இவ்விழாவில் உணவு, உணவுப் பொருள் வழங்கல் மற்றும் நுகர்வோர் பாதுகாப்புத் துறை அமைச்சர் பி. வெங்கட்ரமணன், மருத்துவம் மற்றும் மக்கள் நல்வாழ்வுத் துறை அரசுச் செயலாளர் டாக்டர் தாரேஸ் அகமது இ.ஆ.ப., பொது சுகாதாரம் மற்றும் நோய்த்தடுப்பு மருந்துத் துறை இணை இயக்குநர் டாக்டர் ஜெரால்டு மரியசெல்வம் ஆகியோர் முன்னிலை வகித்தனர். மேலும் எஸ்.ஐ.இ.டி. கல்வி நிறுவனங்களின் தலைவர் திருமதி பதர் சயீத், ஜஸ்டிஸ் பஷீர் அஹ்மத் சையீத் மகளிர் கல்லூரியின் முதல்வர் அம்துல் அஜீஸ், சுகாதாரத்துறை அலுவலர்கள், பேராசிரியர்கள் மற்றும் மாணவிகள் பெருந்திரளாகப் பங்கேற்று விழிப்புணர்வை முன்னெடுத்தனர்.