அறுந்து கிடக்கும் மின் கம்பிகளைத் தொடாதீர்கள்: புதுச்சேரி மின்துறை இளநிலை பொறியாளர் எச்சரிக்கை!
புதுச்சேரி, 26/10/2026:
புதுச்சேரியில் பருவமழை மற்றும் கனமழை தீவிரமடைந்து வரும் நிலையில், மின்கம்பங்கள் மற்றும் மின்சாரக் கம்பிகள் அருகே பொதுமக்கள் மிகுந்த கவனத்துடன் இருக்குமாறு மின்துறை எச்சரித்துள்ளது. இது தொடர்பாகப் புதுச்சேரி மின்துறை முருங்கப்பாக்கம் பிரிவு இளநிலை பொறியாளர் பொதுமக்களுக்கு முக்கியப் பாதுகாப்பு வழிகாட்டுதல்களை வெளியிட்டுள்ளார்.
அதில் கூறியிருப்பதாவது: “புதுச்சேரியில் பெய்து வரும் கனமழையின் காரணமாக மின் அதிர்ச்சி (எலக்ட்ரிக் ஷாக்) மற்றும் வீடுகளில் உள்ள மின் உபகரணங்கள் சேதமடையும் அபாயம் அதிகரித்துள்ளது. எனவே, மின்கம்பங்கள், மின்மாற்றிகள் (டிரான்ஸ்பார்மர்கள்), துணை மின் நிலையங்கள், மின் மீட்டர்கள் அல்லது தெருவிளக்குக் கம்பங்கள் ஆகியவற்றின் அருகில் தேங்கியுள்ள மழைநீர் மற்றும் வெள்ளம் சூழ்ந்த பகுதிகளுக்குள் பொதுமக்கள் தேவையின்றி நுழைய வேண்டாம்.
குறிப்பாக, பலத்த காற்று மற்றும் மழையால் மின்கம்பிகள் ஏதேனும் அறுந்து கீழே விழுந்து கிடந்தால், அவற்றை எக்காரணம் கொண்டும் தொடவோ அல்லது தாங்களாகவே அப்புறப்படுத்த முயற்சிக்கவோ கூடாது. சுவிட்ச்போர்டும் கைகளும் முற்றிலும் உலர்ந்த நிலையில் இருந்தால் மட்டுமே வீட்டின் முதன்மை மின் இணைப்பை (மெயின் சுவிட்ச்) அணைக்க வேண்டும்; இல்லையெனில் மின்வாரிய அங்கீகாரம் பெற்ற பணியாளர்கள் வரும் வரை காத்திருக்க வேண்டும்.
மழைக்கால அவசர மின் பிரச்சினைகள் மற்றும் ஆபத்தான நிலைகள் குறித்துத் தகவல் தெரிவிக்க 94890 80326 அல்லது 1912 என்ற அவசர உதவி எண்களை உடனடியாகத் தொடர்பு கொள்ளலாம். மேலும், முருங்கப்பாக்கம் இயக்குதல் மற்றும் பராமரித்தல் மின் அலுவலகத்தையும் நேரில் அல்லது தொலைபேசியில் அணுகலாம். பொதுமக்களின் ஒத்துழைப்பே அனைவரின் பாதுகாப்பையும் உறுதி செய்யும்” எனத் தெரிவிக்கப்பட்டுள்ளது.
