காரைக்கால் மீன்பிடித் துறைமுக மேம்பாட்டுத் திட்டம்: கருக்களாச்சேரியில் 11 மீனவ கிராமப் பிரதிநிதிகள் முக்கிய ஆலோசனை!
காரைக்கால்: காரைக்கால் மாவட்டம் கருக்களாச்சேரி கிராமத்தில் சுமார் ₹130 கோடி மதிப்பீட்டில் நவீனமயமாக்கப்பட்டு வரும் மீன்பிடித் துறைமுகத் திட்டப் பணிகள் தொடர்பாக, கிராம மக்கள் மற்றும் பஞ்சாயத்துப் பிரதிநிதிகள் பங்கேற்ற ஆலோசனைக் கூட்டம் நிரவி–திருப்பட்டினம் சட்டமன்ற உறுப்பினர் டி.கே.எஸ்.எம். மீனாட்சிசுந்தரம் தலைமையில் நடைபெற்றது.
கருக்களாச்சேரி பகுதியில் நவீன உள்கட்டமைப்பு வசதிகளுடன் அமையவுள்ள மீன்பிடித் துறைமுக மேம்பாட்டுத் திட்டம் தொடர்பாக அப்பகுதி கிராம மக்களிடையே தொடக்கம் முதலே பல்வேறு மாறுபட்ட கருத்துக்கள் நிலவி வருகின்றன. குறிப்பாக, தற்போது இத்திட்டம் செயல்படுத்த திட்டமிடப்பட்டுள்ள இடத்திலிருந்து சுமார் 150 மீட்டர் தொலைவில் உள்ள மாற்று இடத்தில் துறைமுகத்தை அமைக்க வேண்டும் என்று கருக்களாச்சேரி மக்கள் தொடர்ந்து கருத்துக்களை முன்வைத்து வருகின்றனர்.
இந்நிலையில், மீனவ மக்களின் இந்த மாற்று இடம் குறித்த கோரிக்கையை விரிவாக ஆராயவும், திட்டத்தை எவ்வித இடர்ப்பாடுகளுமின்றி முன்னெடுப்பது குறித்தும் விவாதிக்க கருக்களாச்சேரியில் சிறப்புக் கூட்டம் கூட்டப்பட்டது. இதில் கருக்களாச்சேரி கிராம மக்கள் மற்றும் காரைக்கால் மாவட்டத்தைச் சேர்ந்த 11 மீனவ கிராமப் பஞ்சாயத்துப் பிரதிநிதிகள் திரளாகக் கலந்துகொண்டனர்.
கூட்டத்திற்குத் தலைமை தாங்கிய தொகுதி சட்டமன்ற உறுப்பினர் டி.கே.எஸ்.எம். மீனாட்சிசுந்தரம், கிராம மக்களின் கருத்துக்களையும் பஞ்சாயத்துப் பிரதிநிதிகளின் ஆலோசனைகளையும் கேட்டறிந்தார். மீனவ மக்களின் வாழ்வாதாரத்தைப் பாதுகாக்கும் வகையிலும், அவர்களது தேவைகளைக் கருத்தில் கொண்டும், அனைவரும் ஒன்றிணைந்து பேசி உரிய சுமூகத் தீர்வு காண்பதே இக்கூட்டத்தின் பிரதான நோக்கமாகும் எனத் தெரிவிக்கப்பட்டது.
