ஊசுடு தொகுதியில் பாஜகவின் ‘ஜனநாயகத்தைக் காப்போம், வன்முறையாளர்களை வேரறுப்போம்’ விழிப்புணர்வு மாநாடு!
புதுச்சேரி: புதுச்சேரி மாநிலம் வில்லியனூர் மாவட்டத்திற்கு உட்பட்ட ஊசுடு சட்டமன்றத் தொகுதியில் பாரதிய ஜனதா கட்சியின் சார்பில் “ஜனநாயகத்தைக் காப்போம்! வன்முறையாளர்களை வேரறுப்போம்!” என்ற தலைப்பில் சிறப்பு அரசியல் விழிப்புணர்வு மற்றும் ஆலோசனைக் கூட்டம் மிக எழுச்சியாக நடைபெற்றது. பாஜக மாநிலத் துணைத் தலைவர் அண்ணா ஜெயகுமார் தலைமையில் நடைபெற்ற இந்த நிகழ்வில், தொகுதியின் முக்கியப் பிரமுகர்கள் மற்றும் பொதுமக்கள் பெருந்திரளாகக் கலந்து கொண்டனர்.
இக்கூட்டத்தில் ஊசுடு தொகுதி முக்கியஸ்தர்களின் ஆலோசனைக் கலந்துரையாடலும், அதனைத் தொடர்ந்து எஸ்.ஐ.ஆர். (S.I.R) குறித்த பொது விழிப்புணர்வு உரைகளும் இடம்பெற்றன. அமைதிப் பூங்காவாக விளங்கும் புதுச்சேரியில் சட்டம் – ஒழுங்கைப் பாதுகாப்பது, சமூக விரோதச் சக்திகளைத் தடுத்து நிறுத்துவது மற்றும் பொதுமக்களின் உரிமைகளைப் பாதுகாப்பது தொடர்பாக விரிவான கருத்துரைகள் இக்கூட்டத்தில் முன்வைக்கப்பட்டன.
நிகழ்வில் உரையாற்றிய தலைவர்கள் பேசுகையில், புதுச்சேரியின் அமைதியையும் மக்களாட்சி மாண்புகளையும் சீர்குலைக்க நினைக்கும் எந்தவொரு வன்முறைச் சக்தியையும் பாஜக முழுமையாக வேரறுக்கும் என்றும், பொதுமக்களின் முழுமையான பாதுகாப்பையும் ஊசுடு தொகுதியின் கட்டமைப்பு மற்றும் சமூக வளர்ச்சியையும் உறுதி செய்வதில் கட்சி எப்போதுமே முன்னிற்கும் என்றும் சூளுரைத்தனர்.
புதுச்சேரி யூனியன் பிரதேசத்தில் அரசியல் தளத்தில் பல்வேறு கட்சிகளும் தீவிர களப்பணிகளை முடுக்கிவிட்டுள்ளன. குறிப்பாக, காங்கிரஸ் உள்ளிட்ட எதிர்க்கட்சிகள் 23 தொகுதிகளிலும் அரசியல் பிரச்சாரங்களை முன்னெடுத்து வரும் பரபரப்பான சூழலில், ஆளும் தேசிய ஜனநாயகக் கூட்டணியின் முக்கிய அங்கமான பாஜகவும் தொகுதி வாரியாக மக்கள் சந்திப்பு மற்றும் விழிப்புணர்வு கூட்டங்களை நடத்தி வருவது அரசியல் களத்தில் முக்கியத்துவம் பெறுகிறது.
ஊசுடு தொகுதியில் நடைபெற்ற இந்த விழிப்புணர்வு நிகழ்வில் திரளான பாஜக நிர்வாகிகள், உள்ளூர் முக்கியப் பிரமுகர்கள் மற்றும் பொதுமக்கள் கலந்துகொண்டு தங்களது ஆதரவை வெளிப்படுத்தினர். இக்கூட்டத்திற்கான ஏற்பாடுகளை பாஜக மாநில துணைத் தலைவர் அண்ணா ஜெயகுமார் தலைமையிலான குழுவினர் விரிவாகச் செய்திருந்தனர்.
