புதுச்சேரியில் 31 கிராமங்கள் காசநோய் இல்லாத கிராமங்களாக மாற்றம்: முதல்வர் ரங்கசாமி பெருமிதம்!
புதுச்சேரி: புதுச்சேரி மாநிலத்தில் இதுவரை 31 கிராமங்கள் காசநோய் இல்லாத கிராமங்களாக (TB-Free Villages) அதிகாரப்பூர்வமாக அறிவிக்கப்பட்டுள்ளதாகவும், மேலும் 41 கிராமங்களை காசநோயற்ற பகுதிகளாக மாற்றும் தீவிர நடவடிக்கைகள் துரிதமாக முன்னெடுக்கப்பட்டு வருவதாகவும் முதலமைச்சர் என். ரங்கசாமி தெரிவித்துள்ளார்.
புதுச்சேரியில் புகையிலை மற்றும் போதைப்பொருள் பழக்கங்களை அடியோடு ஒழித்து, காசநோய் இல்லாத ஆரோக்கியமான சமுதாயத்தை உருவாக்கும் நோக்கில் அரசு பல்வேறு விழிப்புணர்வு நடவடிக்கைகளை முன்னெடுத்து வருகிறது. இதன் ஒரு பகுதியாக, புகையிலை பயன்பாட்டினால் ஏற்படும் கொடிய உடல்நலப் பாதிப்புகள் குறித்து பொதுமக்களிடையே விழிப்புணர்வை ஏற்படுத்தும் நோக்கில் மாணவர்கள் மற்றும் இளைஞர்கள் பங்கேற்ற விழிப்புணர்வு நடைபயணம் நடைபெற்றது.
தொடர்ந்து செய்தியாளர்களிடம் பேசிய முதலமைச்சர் ரங்கசாமி, புகைப்பிடித்தல் மற்றும் புகையிலைப் பயன்பாடு ஆகியவை காசநோய் உள்ளிட்ட பல்வேறு தீவிர நோய்கள் தீவிரமடைவதற்கு முக்கியக் காரணமாக அமைகின்றன என்று எச்சரித்தார். எனவே, பொதுமக்கள் புகையிலைப் பழக்கத்தை முற்றிலும் கைவிட வேண்டும் என்று அறிவுறுத்திய அவர், குறிப்பாக மாணவர்கள் மற்றும் இளைஞர்கள் போதைப்பொருட்களுக்கு அடிமையாகாமல், தங்கள் உடல்நலனையும் எதிர்காலத்தையும் கவனமுடன் பாதுகாக்க வேண்டும் என்று வேண்டுகோள் விடுத்தார்.
மேலும், புதுச்சேரி மக்களின் மருத்துவத் தேவைகளுக்கு ஏற்ப ஆரம்ப சுகாதார நிலையங்கள் உள்ளிட்ட மருத்துவக் கட்டமைப்புகள் தொடர்ந்து மேம்படுத்தப்பட்டு, தரமான சிகிச்சைகள் வழங்கப்பட்டு வருகின்றன. காசநோய் மற்றும் போதைப்பொருட்கள் இல்லாத ஆரோக்கியமான புதுச்சேரியை முழுமையாக உருவாக்க பொதுமக்களின் ஒத்துழைப்பு மிக அவசியமானது என்றும் முதலமைச்சர் ரங்கசாமி வலியுறுத்தினார்.
