புதுச்சேரி சுற்றுலா வளர்ச்சி திட்டங்களுக்கு ரூ.100.93 கோடி ஒதுக்கீடு: மத்திய அரசு ஒப்புதல்!
புதுச்சேரி: புதுச்சேரி மாநிலத்தின் சுற்றுலாத் துறையை சர்வதேச தரத்தில் மேம்படுத்தும் நோக்கில் தயாரிக்கப்பட்ட பல்வேறு வளர்ச்சி திட்டங்களுக்கு மத்திய அரசு முதற்கட்டமாக ரூ.100.93 கோடி நிதி ஒதுக்கீடு செய்து ஒப்புதல் அளித்துள்ளது.
இது தொடர்பாக அரசு பிரதிநிதிகள் மற்றும் துறை சார்ந்த அதிகாரிகளுடன் நடைபெற்ற ஆலோசனைக் கூட்டத்தில் வளர்ச்சி திட்டப் பணிகள் குறித்து விரிவாக விவாதிக்கப்பட்டது. இந்த நிதியின் மூலம் புதுச்சேரியின் புகழ்பெற்ற கடற்கரை சாலை, பாரதி பூங்கா, பழைய துறைமுக பகுதி மற்றும் கலங்கரை விளக்கம் செல்லும் சாலைகள் உள்ளிட்ட முக்கிய பகுதிகள் நவீன முறையில் மேம்படுத்தப்பட உள்ளன.
மேலும், சுற்றுலா பயணிகளுக்கான அடிப்படை கட்டமைப்பு வசதிகள், பாதுகாப்பு மற்றும் பொழுதுபோக்கு அம்சங்கள் ஆகியவை இந்த நிதியுதவி மூலம் உலகத்தரம் வாய்ந்ததாக மாற்றியமைக்கப்படும் எனத் தெரிவிக்கப்பட்டுள்ளது. இதனிடையே, ஏனாம் பகுதியில் நடைபெறவுள்ள புகழ்பெற்ற புஷ்கர் திருவிழாவிற்காக ரூ.59 கோடி மதிப்பீட்டில் புதிய மேம்பாட்டு திட்டங்களும் செயல்படுத்தப்பட உள்ளதாக தெரிவிக்கப்பட்டுள்ளது.
புதுச்சேரியின் பொருளாதாரத்தில் முக்கிய பங்கு வகிக்கும் சுற்றுலாத்துறையை மேலும் வலுப்படுத்த இந்த நிதி ஒதுக்கீடு பெரும் உந்துதலாக அமையும் என எதிர்பார்க்கப்படுகிறது.
English summary: The Central government has sanctioned an initial Rs 100.93 crore for tourism development projects in Puducherry, covering areas such as the Beach Road, Bharathi Park, the old port area and roads leading to the lighthouse. It was also stated that new development works worth Rs 59 crore will be carried out for the Pushkaram festival in Yanam. The fund is expected to boost the tourism sector.
