புதுச்சேரியில் தேங்கும் மழைநீரை வெளியேற்ற கூடுதல் மோட்டார் பம்புகள்: அமைச்சர் மல்லாடி கிருஷ்ணாராவ் உத்தரவு!
புதுச்சேரி: வங்கக்கடலில் உருவாகியுள்ள காற்றழுத்தத் தாழ்வு மண்டலம் காரணமாகப் புதுச்சேரியின் நகர்ப்புறங்கள் மற்றும் கிராமப்புறப் பகுதிகளில் பரவலாகத் தொடர் மழை பெய்து வருகிறது. இதன் காரணமாக நகரின் தாழ்வான பகுதிகள் மற்றும் முக்கிய சாலைகளில் மழைநீர் பெருமளவில் தேங்கியுள்ளதால், பொதுமக்கள் மற்றும் வாகன ஓட்டிகள் பெரும் சிரமத்திற்கு உள்ளாகியுள்ளனர்.
இதனையடுத்து நிலைமையைக் கட்டுக்குள் கொண்டுவர அமைச்சர் மல்லாடி கிருஷ்ணாராவ், மாவட்ட ஆட்சியர் குலோத்துங்கனுடன் இணைந்து மழைநீர் தேங்கியுள்ள பல்வேறு பகுதிகளுக்கு நேரில் சென்று கள ஆய்வு மேற்கொண்டார். அப்போது மழைநீர் தேங்குவதற்கான காரணங்கள் மற்றும் அதனை உடனடியாக வெளியேற்றுவதற்கான துரித நடவடிக்கைகள் குறித்து அதிகாரிகளிடம் விரிவாகக் கேட்டறிந்தார்.
இதனைத் தொடர்ந்து புதுச்சேரி சட்டப்பேரவை வளாகத்தில் பொதுப்பணித்துறை அதிகாரிகளுடன் அவசர ஆலோசனைக் கூட்டம் நடைபெற்றது. இதில் பொதுப்பணித்துறை செயற்பொறியாளர்கள் ஸ்ரீநிவாசன், ஸ்ரீநிவாஸ்ராம் மற்றும் உதவிப் பொறியாளர் பாலாஜி உள்ளிட்ட உயர் அலுவலர்கள் கலந்துகொண்டனர். இக்கூட்டத்தில் பேசிய அமைச்சர், நகரில் தற்போது பயன்பாட்டில் உள்ள பம்புகளுடன் கூடுதலாக அதிதிறன் கொண்ட மோட்டார் பம்புகளை உடனடியாக இயக்கி, தேங்கியுள்ள நீரை விரைவாக வெளியேற்ற வேண்டும் என்று உத்தரவிட்டார்.
மேலும் மழைநீர் அதிகம் தேங்கும் தாழ்வான பகுதிகளைத் தொடர்ந்து கண்காணித்து, பொதுமக்களின் இயல்பு வாழ்க்கைக்குப் பாதிப்பு ஏற்படாத வண்ணம் முன்னெச்சரிக்கை நடவடிக்கைகளை மேற்கொள்ளுமாறு பொதுப்பணித்துறைக்கு அறிவுறுத்தப்பட்டது. ஒவ்வொரு மழைக்காலத்திலும் ஏற்படும் இந்த இடர்பாடுகளுக்கு முற்றுப்புள்ளி வைக்கும் வகையில், மழைநீர் வடிகால்களைச் சீரமைத்தல் மற்றும் நீர்வழிப் பாதைகளில் உள்ள அடைப்புகளை அகற்றி நிரந்தரத் தீர்வு காண்பதற்கான முறையான திட்டங்களைத் தயார் செய்யுமாறும் அதிகாரிகளுக்கு அமைச்சர் மல்லாடி கிருஷ்ணாராவ் திட்டவட்டமாக அறிவுறுத்தினார்.
