தேசிய இணையப் பாதுகாப்பு விழிப்புணர்வு மாதம்: சிவில் விமானப் போக்குவரத்து அமைச்சகத்தில் சிறப்புப் பயிலரங்கம்!
புதுடெல்லி:
தேசிய இணையப் பாதுகாப்பு விழிப்புணர்வு மாதத்தை (NCSAM – அக்டோபர் 2026) முன்னிட்டு, மத்திய சிவில் விமானப் போக்குவரத்து அமைச்சகம் மற்றும் மத்திய உள்துறை அமைச்சகத்தின் கீழ் இயங்கும் ‘சைபர்தோஸ்த்’ (Cyberdost) ஆகியவை இணைந்து இணைய சுகாதாரம் மற்றும் டிஜிட்டல் பாதுகாப்பு குறித்த சிறப்பு விழிப்புணர்வுக் கலந்துரையாடல் நிகழ்வை ராஜீவ் காந்தி பவனில் நடத்தின.
தற்காலத்தில் தீவிரமடைந்து வரும் இணையவழி அச்சுறுத்தல்கள், போலி முதலீட்டு மோசடிகள் மற்றும் பொதுமக்களை அச்சுறுத்தும் ‘டிஜிட்டல் கைது’ (Digital Arrest) போன்ற மோசடி உத்திகள் குறித்து இந்த அமர்வில் விரிவாக எடுத்துரைக்கப்பட்டது. மேலும் இணையவழி பணப் பரிவர்த்தனைகளின் போது கடைப்பிடிக்க வேண்டிய நிதி பாதுகாப்பு முறைகள், தனிநபர் தரவுப் பாதுகாப்பு (Data Privacy) மற்றும் பாதுகாப்பான இணையப் பயன்பாட்டு நெறிமுறைகள் குறித்துப் பணியாளர்களுக்கு விளக்கமளிக்கப்பட்டது.
இணைய பயன்பாட்டின் போது பொதுமக்கள் மற்றும் ஊழியர்கள் எப்போதும் விழிப்புடன் செயல்பட வேண்டும் என்று அதிகாரிகள் அறிவுறுத்தினர். சந்தேகத்திற்குரிய இணையதள முகவரிகளை ஆராயாமல் கிளிக் செய்வதைத் தவிர்க்க வேண்டும், ரகசிய ஓடிபி (OTP) மற்றும் கடவுச்சொற்களை எக்காரணம் கொண்டும் மற்றவர்களுடன் பகிரக்கூடாது என வலியுறுத்தப்பட்டது. ஏதேனும் இணையக் குற்றங்கள் அல்லது மோசடிகள் நேர்ந்தால் உடனடியாகத் தேசிய இணையக் குற்றப் புகார் பிரிவில் புகார் பதிவு செய்யுமாறு கேட்டுக் கொள்ளப்பட்டது.
டிஜிட்டல் இந்தியாவின் வளர்ச்சிப் பாதையில் பாதுகாப்பான இணையக் கட்டமைப்பை உருவாக்க அனைவரும் விழிப்புணர்வுடன் செயல்பட வேண்டியதன் அவசியத்தை இந்நிகழ்வு உணர்த்தியது. சாலைகளில் விபத்துகளைத் தடுக்க விதிமுறைகளைக் கடைப்பிடிப்பது எவ்வளவு அவசியமோ, அதேபோன்று டிஜிட்டல் தளங்களிலும் முறையான பாதுகாப்பு நெறிமுறைகளைப் பின்பற்றுவது குற்றங்களைத் தடுக்கும் என விழிப்புணர்வு முகாமில் தெளிவுபடுத்தப்பட்டது.
