புற்றுநோய் சிகிச்சைக்கான 543 மருந்துகளின் விலை அதிரடி குறைப்பு: மத்திய அரசு அதிகாரப்பூர்வ அறிவிப்பு!
புதுடெல்லி:
நாட்டில் புற்றுநோய் சிகிச்சைக்கு பயன்படுத்தப்படும் அத்தியாவசிய மருந்துகளின் விலையைக் கட்டுப்படுத்தி ஏழை மற்றும் நடுத்தர மக்களுக்கு சிகிச்சைச் செலவைக் குறைக்கும் வகையில், மத்திய அரசின் தேசிய மருந்து விலை நிர்ணய ஆணையம் (NPPA) முக்கிய உத்தரவை பிறப்பித்துள்ளது. அதன்படி, புற்றுநோய் சிகிச்சைக்கான 543 மருந்து பிராண்டுகளின் அதிகபட்ச சில்லறை விலையைத் (MRP) திருத்தி புதிய உச்சவரம்பை நிர்ணயித்து அறிவித்துள்ளது.
இந்த விலை குறைப்பு மற்றும் திருத்தப்பட்ட புதிய கட்டணங்கள் வரும் நவம்பர் 9-ஆம் தேதி முதல் நாடு முழுவதும் முறைப்படி அமலுக்கு வர உள்ளதாக தெரிவிக்கப்பட்டுள்ளது. இதன் மூலம், புற்றுநோய் பாதிப்புக்கு உள்ளாகி சிகிச்சை பெற்று வரும் பல லட்சக்கணக்கான நோயாளிகள் மற்றும் அவர்களது குடும்பத்தினர் பெரும் நிதிச் சுமையிலிருந்து விடுபட வாய்ப்பு ஏற்பட்டுள்ளது.
இது தொடர்பாக மத்திய வேதிப்பொருட்கள் மற்றும் உரத்துறை அமைச்சகம் வெளியிட்டுள்ள தகவலில், உயிர் காக்கும் முக்கிய மருந்துகளின் விலை பொதுமக்களுக்கு கட்டுப்படியாகும் வகையில் இருப்பதை உறுதி செய்ய அரசு தொடர்ந்து நடவடிக்கை எடுத்து வருவதாகவும், அதன் தொடர்ச்சியாகவே புற்றுநோய் சிகிச்சையில் பயன்படும் பல்வேறு முன்னணி மருந்து பிராண்டுகளின் விலை கணிசமாகக் குறைக்கப்பட்டுள்ளதாகவும் தெரிவிக்கப்பட்டுள்ளது.
ஏற்கனவே பொதுமக்களின் சுகாதாரப் பாதுகாப்பை மேம்படுத்த பல்வேறு மருத்துவத் திட்டங்கள் மற்றும் தீவிர நோய்களுக்கான சிறப்பு சிகிச்சை நடவடிக்கைகள் முன்னெடுக்கப்பட்டு வருகின்றன. அந்த வகையில், மத்திய அரசின் இந்த அதிரடி நடவடிக்கை நாடு முழுவதும் உள்ள ஏழை, எளிய புற்றுநோயாளிகளுக்கு தரமான மற்றும் குறைந்த செலவிலான மருத்துவ சேவையை உறுதி செய்வதில் மிக முக்கியமான மைல்கல்லாக அமையும் என்று எதிர்பார்க்கப்படுகிறது.
