ஜிப்மரில் மாதம் ரூ.1.11 லட்சம் சம்பளத்தில் மத்திய அரசு வேலை: ஐசிஎம்ஆர் ஆராய்ச்சி பணிக்கு விண்ணப்பங்கள் வரவேற்பு!
புதுச்சேரி: புதுச்சேரி ஜிப்மர் (JIPMER) மருத்துவக் கல்வி மற்றும் ஆராய்ச்சி நிறுவனத்தில், மத்திய அரசின் இந்திய மருத்துவ ஆராய்ச்சி கவுன்சில் (ICMR) நிதி நல்கையுடன் செயல்படும் ஆராய்ச்சி திட்டத்திற்கு ‘ப்ராஜெக்ட் ரிசர்ச் சயின்டிஸ்ட்-III (மெடிக்கல்)’ பணிக்குத் தகுதியான நபர்களிடமிருந்து விண்ணப்பங்கள் வரவேற்கப்படுவதாக அதிகாரப்பூர்வமாக அறிவிக்கப்பட்டுள்ளது.
தேசிய முக்கியத்துவம் வாய்ந்த புதுச்சேரி ஜிப்மரில் தொழிலாளர்களின் உடல்நலம் மற்றும் கடுமையான வெப்ப தாக்கம் குறித்து ஆராயும் ‘HEALTH’ (Heat Exposure Assessment and Labour-Tailored Interventions) என்ற முன்னோடி ஆராய்ச்சி திட்டம் செயல்படுத்தப்பட உள்ளது. இத்திட்டத்தின் கீழ் ‘ப்ராஜெக்ட் ரிசர்ச் சயின்டிஸ்ட்-III (மருத்துவம்)’ பிரிவில் காலியாக உள்ள 1 பணியிடம் ஓராண்டு கால ஒப்பந்த அடிப்படையில் நிரப்பப்பட உள்ளது. இப்பணிக்குத் தேர்வு செய்யப்படுபவருக்கு அடிப்படை ஊதியம் ரூ.93,000 மற்றும் 20 சதவீத வீட்டு வாடகை படி (HRA) சேர்த்து மாதம் ரூ.1,11,600 ஒருங்கிணைந்த ஊதியமாக வழங்கப்படும்.
இப்பணிக்கு விண்ணப்பிக்க விரும்புவோர் எம்பிபிஎஸ் அல்லது பிடிஎஸ் (MBBS/BDS) பட்டத்துடன் எம்.டி அல்லது எம்.டி.எஸ் (MD/MDS) முடித்து 3 ஆண்டுகள் மருத்துவ பணி அனுபவம் பெற்றிருக்க வேண்டும். அல்லது சுற்றுச்சூழல் சுகாதாரம் (Environmental Health) அல்லது தொழில்சார் சுகாதாரம் (Occupational Health) பிரிவில் முனைவர் பட்டம் (Ph.D.) பெற்றிருக்க வேண்டும். மேலும், தமிழ் மற்றும் ஆங்கிலத்தில் சரளமாகப் பேசும் திறன், SPSS, STATA, R போன்ற மென்பொருட்கள் வாயிலாக புள்ளிவிவர தரவுகளைக் கையாளும் திறன் மற்றும் சுற்றுச்சூழல் சுகாதார ஆய்வுகளில் முன் அனுபவம் பெற்றிருப்பது கூடுதல் தகுதியாகக் கருதப்படுகிறது.
தகுதியும் விருப்பமும் உள்ள மருத்துவ மற்றும் ஆராய்ச்சி வல்லுநர்கள் ஜிப்மர் நிர்ணயித்துள்ள மாதிரி விண்ணப்பப் படிவத்தைப் பூர்த்தி செய்து, சுயவிவரக் குறிப்பு (CV) மற்றும் கல்விச் சான்றிதழ்களின் நகல்களை ஒரே பிடிஎஃப் (PDF) கோப்பாக இணைத்து [email protected] என்ற அதிகாரப்பூர்வ மின்னஞ்சல் முகவரிக்கு அனுப்ப வேண்டும். விண்ணப்பங்களைச் சமர்ப்பிக்க வரும் 2026 நவம்பர் 5-ஆம் தேதி மாலை 5:00 மணி கடைசி நாளாகும்.
புதுச்சேரி ஜிப்மர் நிறுவனம் மருத்துவ சிகிச்சையோடு மட்டுமல்லாமல், பல்வேறு சமூக மற்றும் பொதுசுகாதார சவால்களுக்குத் தீர்வு காணும் வகையில் தொடர்ந்து உயர்மட்ட ஆராய்ச்சிகளை முன்னெடுத்து வருகிறது. தொழிலாளர்களின் பாதுகாப்பு சார்ந்த இந்த முக்கியத் திட்டத்தில் இணைந்து பணியாற்ற மருத்துவ வல்லுநர்களுக்கு இது அரிய வாய்ப்பாகும். முழுமையற்ற விண்ணப்பங்கள் எவ்வித முன்னறிவிப்புமின்றி நிராகரிக்கப்படும் என்பதால், தகுதியுடைய விண்ணப்பதாரர்கள் உரிய வழிகாட்டுதல்களைப் பின்பற்றி குறித்த நேரத்திற்குள் விண்ணப்பிக்குமாறு ஜிப்மர் நிர்வாகம் அறிவுறுத்தியுள்ளது.
