“திமுகவினரை மிரட்ட ‘ரெய்டு ஷோ’; வாஷிங் மெஷினாக மாறிய த.வெ.க அரசு!” – மு.க.ஸ்டாலின் கடும் தாக்குதல்!
சென்னை: தமிழகத்தில் பெண்கள், குழந்தைகள் மற்றும் முதியோருக்குப் பாதுகாப்பற்ற சூழலை உருவாக்கிவிட்டு, மக்களின் கவனத்தைத் திசைதிருப்பவே த.வெ.க அரசு ‘ரெய்டு ஷோ’ நடத்தி வருவதாக திமுக தலைவர் மு.க.ஸ்டாலின் மிகக் கடுமையாகச் சாடியுள்ளார். தங்களது அரசியல் தோல்விகளையும் நிர்வாகச் சீர்கேடுகளையும் மறைக்க ஆளும் அரசு மேற்கொள்ளும் இத்தகைய மிரட்டல் நடவடிக்கைகளுக்கு திமுகவின் கடைக்கோடித் தொண்டன் கூட அஞ்சமாட்டான் என்றும் அவர் எச்சரித்துள்ளார்.
இதுதொடர்பாக அவர் வெளியிட்டுள்ள கண்டனப் பதிவில், தமிழகத்தில் சட்டம்-ஒழுங்கு அடியோடு சீர்குலைந்து, துருப்பிடித்த நிர்வாகமும் அத்தியாவசியப் பொருட்களின் விலைவாசி உயர்வும் பொதுமக்களைக் கடுமையாக வாட்டி வதைத்து வருகிறது எனக் குற்றம்சாட்டியுள்ளார். இத்தகைய அவலங்களை மக்கள் மன்றத்திலிருந்தும் ஊடகங்களின் கவனத்திலிருந்தும் திசைதிருப்புவதற்காகவே ‘ரோடு ஷோ’ நடத்துவதா அல்லது ‘ரெய்டு ஷோ’ நடத்துவதா என முதலமைச்சர் சிந்தித்துச் செயல்பட்டு வருகிறார் என விமர்சித்துள்ளார்.
மேலும், த.வெ.க அரசை ‘தமிழ்நாடு கிளை வாஷிங் மெஷின்’ எனக் கடுமையாகச் சாடிய அவர், ஆளுங்கட்சியோடு கைகோர்க்கும் ஊழல்வாதிகளைப் புனிதர்களாக்கிக் கொண்டு, அரசியல் காழ்ப்புணர்ச்சியுடன் திமுக முன்னாள் அமைச்சர்களை மட்டுமே குறிவைத்து சோதனைகள் நடத்தப்படுவதாகத் தெரிவித்தார். இத்தகைய பழிவாங்கும் நடவடிக்கைகள் சட்டத்தின் முன்பும் மக்கள் மன்றத்திலும் படுதோல்வி அடையும் எனவும், திருச்சி கிழக்கு இடைத்தேர்தலுக்காக முதலமைச்சர் மேடைகளில் ரீல்ஸ் வீடியோக்களுக்காகப் பஞ்ச் வசனம் பேசுவதை மக்கள் பார்த்துக்கொண்டுதான் இருக்கிறார்கள் என்றும் மு.க.ஸ்டாலின் கூறியுள்ளார்.
ஏற்கனவே மாநிலத்தில் சட்டம்-ஒழுங்கு சீர்கேடு மற்றும் விலைவாசி உயர்வைக் கண்டித்து திமுக மகளிர் அணி சார்பில் தீவிர கண்டன ஆர்ப்பாட்டங்கள் திட்டமிடப்பட்டு ஆலோசனைக் கூட்டங்கள் முன்னெடுக்கப்பட்டு வரும் பரபரப்பான அரசியல் சூழலில், ஆளும் த.வெ.க அரசுக்கு எதிராக மு.க.ஸ்டாலின் விடுத்துள்ள இந்த காரசாரமான அறிக்கை அரசியல் களத்தில் பெரும் விவாதத்தை ஏற்படுத்தியுள்ளது.
