பாஜக தேசிய பொதுச் செயலாளர் பி.எல்.சந்தோஷுடன் நிரவி-திருப்பட்டினம் எம்எல்ஏ மீனாட்சிசுந்தரம் டெல்லியில் சந்திப்பு!

புதுடெல்லி: புதுச்சேரி மாநிலம் காரைக்கால் மாவட்டத்திற்குட்பட்ட நிரவி–திருப்பட்டினம் தொகுதி சட்டமன்ற உறுப்பினர் டி.கே.எஸ்.எம். மீனாட்சிசுந்தரம், புதுடெல்லியில் உள்ள பாரதிய ஜனதா கட்சியின் தலைமை அலுவலகத்தில் பாஜக தேசிய பொதுச் செயலாளர் (அமைப்பு) பி.எல். சந்தோஷை நேரில் சந்தித்துப் பேசினார். புதுடெல்லிக்கு அரசு மற்றும் கட்சி ரீதியான பணிகளுக்காகச் சென்றிருந்த அவர், பாஜக தேசிய தலைமையகத்தில் இந்தச் சந்திப்பை மேற்கொண்டார்.

மரியாதை நிமித்தமாக நடைபெற்ற இந்த முக்கியச் சந்திப்பின் போது, புதுச்சேரி யூனியன் பிரதேசத்தின் தற்போதைய கள அரசியல் நிலவரங்கள் குறித்து விரிவாக ஆலோசனை நடத்தப்பட்டது. குறிப்பாக, புதுச்சேரியில் ஆளும் என்.டி.ஏ கூட்டணி அரசின் செயல்பாடுகள், உட்கட்டமைப்பு திட்டங்களின் முன்னேற்றம் மற்றும் கட்சி வளர்ச்சிப் பணிகள் தொடர்பாக இருவரும் முக்கியக் கருத்துகளைப் பகிர்ந்துகொண்டனர்.

தொடர்ந்து, காரைக்கால் பிராந்தியத்தின் அடிப்படைத் தேவைகள், நிரவி-திருப்பட்டினம் தொகுதி மக்களின் நீண்டகால கோரிக்கைகள் மற்றும் அப்பகுதியில் மேற்கொள்ளப்பட வேண்டிய வளர்ச்சித் திட்டங்கள் குறித்து பாஜக தேசிய பொதுச் செயலாளரிடம் சட்டமன்ற உறுப்பினர் மீனாட்சிசுந்தரம் நேரில் விளக்கி எடுத்துரைத்தார். மேலும், புதுச்சேரி மாநிலத்தின் தற்போதைய அரசியல் களம் மற்றும் எதிர்கால திட்டங்கள் குறித்தும் விவாதிக்கப்பட்டது.

புதுச்சேரி யூனியன் பிரதேசத்தில் அரசியல் ரீதியான பல்வேறு நகர்வுகள் தீவிரமடைந்து வரும் தற்போதைய சூழலில், காரைக்கால் பிராந்திய சட்டமன்ற உறுப்பினர் டெல்லி சென்று பாஜகவின் தேசிய முக்கிய நிர்வாகியை நேரில் சந்தித்துப் பேசியிருப்பது புதுவை அரசியல் வட்டாரத்தில் பெரும் கவனத்தையும் முக்கியத்துவத்தையும் பெற்றுள்ளது.

English summary: Nirvi-Thirupattinam MLA T.K.S.M. Meenakshisundaram of Karaikal met BJP national general secretary (organisation) B.L. Santhosh at the BJP headquarters in New Delhi. They discussed the political situation in Puducherry, the functioning of the NDA government and development projects, and the MLA presented long-pending demands of his constituency and the Karaikal region.