வானூர், அக். 28:
விழுப்புரம் மாவட்டம் வானூர் அருகே பூத்துறை சாலையில் ரியல் எஸ்டேட் தொழிலதிபர் வெட்டிக் கொலை செய்யப்பட்ட பரபரப்பு வழக்கில், 6 பேரை காவல்துறையினர் அதிரடியாக கைது செய்து சிறையில் அடைத்தனர்.
வானூர் அடுத்த பூத்துறை பகுதியைச் சேர்ந்த ரியல் எஸ்டேட் தொழிலதிபரான ராஜேந்திரகுமார் என்பவர் சமீபத்தில் மர்ம நபர்களால் மிகக் கொடூரமாக வெட்டிக் கொலை செய்யப்பட்டார். இச்சம்பவம் அப்பகுதியில் பெரும் அதிர்ச்சியையும் பதற்றத்தையும் ஏற்படுத்தியிருந்தது. இந்த கொடூரக் கொலை தொடர்பாக வானூர் போலீசார் வழக்குப் பதிவு செய்து, குற்றவாளிகளை பிடிக்க தனிப்படை அமைத்து தீவிர தேடுதல் வேட்டை நடத்தி வந்தனர்.
இந்நிலையில், இக்கொலை வழக்கில் தொடர்புடைய ஆறு பேரை போலீசார் மடக்கிப் பிடித்து கைது செய்தனர். கைது செய்யப்பட்ட நபர்களிடம் நடத்திய தீவிர விசாரணையில், ராஜேந்திரகுமாரிடம் பணம் கேட்டதாகவும், அவர் பணம் தர மறுத்ததால் ஆத்திரமடைந்து அவரை அரிவாளால் வெட்டி கொலை செய்ததாகவும் கைதானவர்கள் வாக்குமூலம் அளித்துள்ளதாக போலீசார் தெரிவித்தனர்.
மேலும், இக்குற்றச் சம்பவத்திற்கு பயன்படுத்தப்பட்ட ஒரு கார் மற்றும் நான்கு வீச்சரிவாள்களை போலீசார் பறிமுதல் செய்துள்ளனர். கைது செய்யப்பட்ட 6 பேரையும் நீதிமன்றத்தில் ஆஜர்படுத்திய போலீசார், பின்னர் அவர்களை நீதிமன்றக் காவலில் சிறையில் அடைத்தனர்.
