புதுச்சேரி பிரெஞ்சு நிறுவனத்துடன் காஞ்சி மாமுனிவர் கல்லூரி வரலாற்றுச் சிறப்புமிக்க புரிந்துணர்வு ஒப்பந்தம்!
புதுச்சேரி, நவ. 2: புதுச்சேரி லாஸ்பேட்டையில் அமைந்துள்ள காஞ்சி மாமுனிவர் அரசு பட்டமேற்படிப்பு மற்றும் ஆராய்ச்சி நிறுவனமும், உலகப் புகழ்பெற்ற புதுச்சேரி பிரெஞ்சு நிறுவனமும் (IFP) கல்வி மற்றும் ஆராய்ச்சித் துறைகளில் இணைந்து செயல்படுவதற்கான வரலாற்றுச் சிறப்புமிக்க புரிந்துணர்வு ஒப்பந்தத்தில் கையெழுத்திட்டுள்ளன.
இப்புரிந்துணர்வு ஒப்பந்தத்தில் காஞ்சி மாமுனிவர் பட்டமேற்படிப்பு நிறுவனத்தின் இயக்குநர் சசி காந்த டாஷ் மற்றும் புதுச்சேரி பிரெஞ்சு நிறுவனத்தின் இயக்குநர் ரெனோ கோல்சன் ஆகியோர் முறைப்படி கையெழுத்திட்டனர். இரு நிறுவனங்களின் தனித்துவமான ஆற்றல், வளங்கள் மற்றும் நிபுணத்துவத்தை ஒருங்கிணைத்து ஓர் அர்த்தமுள்ள சர்வதேச தரத்திலான கல்வி கூட்டாண்மையை உருவாக்குவதே இதன் தலையாய நோக்கமாகும்.
இந்தக் கூட்டாண்மையின் மூலம் கூட்டு ஆராய்ச்சித் திட்டங்கள், விரிவான கல்விப் பரிமாற்றங்கள், சர்வதேச கருத்தரங்குகள், சிறப்பு பயிலரங்குகள் ஆகியவை முன்னெடுக்கப்பட உள்ளன. இதன் வாயிலாகப் பேராசிரியர்கள் மற்றும் மாணவ-மாணவிகள் இருதரப்பிலும் பங்கேற்று தங்களது ஆய்வுத் திறன்களை மேம்படுத்திக் கொள்ள ஏதுவான புதிய வாய்ப்புகள் உருவாக்கப்படும் எனத் தெரிவிக்கப்பட்டுள்ளது.
குறிப்பாக, மனிதநேயம், சமூக அறிவியல், சுற்றுச்சூழல் ஆய்வுகள், வரலாறு, பண்பாடு மற்றும் அறிவியல் ஆய்வு புலங்களை ஒருங்கிணைக்கும் பன்முகத் துறை ஆய்வுகளுக்கு இந்த ஒப்பந்தம் வழிவகுக்கும். தெற்காசிய கலாச்சாரம் மற்றும் சூழலியல் ஆய்வுகளில் புகழ்பெற்ற பிரெஞ்சு நிறுவனத்துடனான தொடர்பு, மாணவர்களின் ஆய்வுப் பணிகளை அடுத்த கட்டத்திற்கு எடுத்துச் செல்ல உதவும். இந்நிகழ்வை ஒருங்கிணைப்பாளர் மேரி ஜோசபின் அருணா வெற்றிகரமாக ஒருங்கிணைத்தார்.
English summary: Kanchi Mamunivar Government Institute for Postgraduate Studies and Research in Lawspet, Puducherry, and the French Institute of Pondicherry (IFP) signed a memorandum of understanding for cooperation in education and research. It was signed by institute director Sasi Kanta Dash and IFP director Renaud Colson. The partnership is to include joint research projects, academic exchanges, international seminars and workshops, with a focus on multidisciplinary studies in humanities, social sciences and environment.
