புதுச்சேரி அரசு பல் மருத்துவக் கல்லூரி ஊழியர்களின் ரூ.8.5 கோடி சம்பளப் பணம் மாயம்: சைபர் கிரைம் போலீஸ் தீவிர விசாரணை!
புதுச்சேரி, நவம்பர் 4: புதுச்சேரி கோரிமேடு பகுதியில் இயங்கி வரும் மகாத்மா காந்தி அரசு முதுகலைப் பட்டப்படிப்பு பல் மருத்துவமனை மருத்துவர்கள் மற்றும் ஊழியர்களுக்கு ஊதியம் வழங்க வங்கிக் கணக்கில் வைக்கப்பட்டிருந்த ரூ.8.5 கோடி மர்மமான முறையில் மாயமாகியுள்ள சம்பவம் பெரும் பரபரப்பை ஏற்படுத்தியுள்ளது.
புதுச்சேரி கோரிமேடு பகுதியில் புகழ்பெற்ற மகாத்மா காந்தி அரசு முதுகலை பல் மருத்துவ அறிவியல் நிறுவனம் செயல்பட்டு வருகிறது. இங்கு பணிபுரியும் மருத்துவர்கள், பேராசிரியர்கள், மருத்துவப் பணியாளர்கள் மற்றும் இதர ஊழியர்களுக்கு மாத ஊதியம் வழங்குவதற்காகத் தனியாக வங்கிக் கணக்கு பராமரிக்கப்பட்டு வருகிறது. இந்த நிலையில், நடப்பு மாத ஊதியப் பணப்பரிவர்த்தனையை மேற்கொள்ள முயன்றபோது, வங்கிக் கணக்கில் இருந்த சுமார் ரூ.8.5 கோடி நிதி திடீரென காணாமல் போயிருப்பது கண்டு கல்லூரி நிர்வாகத்தினர் பெரும் அதிர்ச்சியடைந்தனர்.
இதுகுறித்து மருத்துவமனை மற்றும் கல்லூரி நிர்வாகம் உடனடியாக புதுச்சேரி சைபர் கிரைம் காவல் பிரிவில் முறையான புகார் அளித்தது. புகாரைத் தொடர்ந்து, சைபர் கிரைம் காவல் ஆய்வாளர் கீர்த்தி வர்மன் தலைமையிலான தனிப்படை போலீசார் வழக்குப் பதிவு செய்து தீவிர விசாரணை மேற்கொண்டு வருகின்றனர்.
வங்கி கணக்கிலிருந்து பணம் எந்தெந்த கணக்குகளுக்கு மாற்றப்பட்டுள்ளது, ஆன்லைன் மூலமாக ஹேக்கிங் செய்து இந்த மோசடி அரங்கேற்றப்பட்டதா அல்லது கணக்கு விவரங்களை உள்ளிருந்தே யாராவது கசியவிட்டனரா என்ற பல்வேறு கோணங்களில் சைபர் கிரைம் நிபுணர்கள் ஆய்வு மேற்கொண்டு வருகின்றனர். அரசு ஊழியர்களின் கோடிக்கணக்கிலான ஊதியப் பணம் வங்கிக் கணக்கிலிருந்து மாயமான சம்பவம் புதுச்சேரி அரசு வட்டாரத்தில் பெரும் அதிர்வலைகளை ஏற்படுத்தியுள்ளது.
English summary: About Rs 8.5 crore kept in a bank account to pay salaries at the Mahatma Gandhi Government Postgraduate Institute of Dental Sciences in Korimedu, Puducherry, is reported to have gone missing. Management noticed the shortfall when trying to process this month’s salaries and complained to the Puducherry cyber crime police. A special team led by Cyber Crime Inspector Keerthi Varman has registered a case and is investigating, including whether it was online hacking or an internal leak of account details.
