காரைக்கால் திருநள்ளாறு அம்பேத்கர் நகரில் சாலை மேம்பாட்டு பணிகள்: அமைச்சர் பெ.ராஜவேலு நேரில் ஆய்வு!

காரைக்கால்: காரைக்கால் மாவட்டம் திருநள்ளாறு கொம்யூனுக்கு உட்பட்ட டாக்டர் அம்பேத்கர் நகர் பகுதியில் நடைபெற்று வரும் சாலை மேம்பாட்டுப் பணிகளை புதுச்சேரி ஆதிதிராவிடர் மற்றும் பழங்குடியினர் நலத்துறை அமைச்சர் பெ.ராஜவேலு நேரில் பார்வையிட்டு ஆய்வு மேற்கொண்டார்.

காரைக்கால் பிராந்தியத்தில் பொதுமக்களின் அடிப்படை உள்கட்டமைப்பு வசதிகளை மேம்படுத்தும் நோக்கில் அரசு சார்பில் பல்வேறு நலத்திட்டங்கள் முன்னெடுக்கப்பட்டு வருகின்றன. அந்த வகையில், திருநள்ளாறு கொம்யூன் பகுதிக்கு உட்பட்ட டாக்டர் அம்பேத்கர் நகரில் பொதுமக்களின் போக்குவரத்து வசதிக்காக சாலை விரிவாக்கம் மற்றும் தார்ச்சாலை அமைக்கும் பணிகள் தீவிரமாக மேற்கொள்ளப்பட்டு வருகின்றன.

இந்த வளர்ச்சிப் பணிகளை கள ஆய்வு செய்த அமைச்சர் பெ.ராஜவேலு, பணிகளின் தரம், உறுதித்தன்மை மற்றும் திட்ட மதிப்பீடுகள் குறித்து அதிகாரிகளிடம் விரிவாகக் கேட்டறிந்தார். மேலும், பணிகளை எவ்வித தாமதமும் இன்றி விரைவாகவும், பொதுமக்கள் திருப்தியடையும் வகையில் தரமாகவும் முடித்து விரைவில் மக்கள் பயன்பாட்டிற்கு கொண்டு வர வேண்டும் என்று சம்பந்தப்பட்ட துறை பொறியாளர்கள் மற்றும் ஒப்பந்ததாரர்களுக்கு அவர் அறிவுறுத்தினார்.

இந்த ஆய்வின் போது, காரைக்கால் விடுதலைச் சிறுத்தைகள் கட்சியின் சார்பில் பி.எஸ்.அரசவளவன் மற்றும் முக்கிய நிர்வாகிகள் அமைச்சர் பெ.ராஜவேலு அவர்களுக்கு பொன்னாடை அணிவித்து உற்சாக வரவேற்பு அளித்தனர். நீண்ட நாட்களாக இப்பகுதியில் நிலவி வந்த சாலை தேவையை பூர்த்தி செய்யும் வகையில் பணிகள் துரிதப்படுத்தப்பட்டு வருவது அப்பகுதி பொதுமக்களிடையே பெரும் வரவேற்பைப் பெற்றுள்ளது.

English summary: Puducherry Adi Dravidar and Tribal Welfare Minister P. Rajavelu inspected road widening and tar road work at Dr. Ambedkar Nagar in Thirunallar Commune, Karaikal. He asked the engineers and contractors to finish the work quickly and with good quality. Karaikal VCK functionary P.S. Arasavalavan and others welcomed him with shawls.