ஏனாமில் புயலால் பாதிக்கப்பட்ட சாவித்திரி நகர் மீனவர்களுக்கு பாஜக சார்பில் நிவாரண உதவிகள்!
ஏனாம்:
புதுச்சேரி யூனியன் பிரதேசத்தின் ஏனாம் பிராந்தியத்தில், ‘அர்னாப்’ புயலின் கோரத் தாண்டவத்தால் கடுமையாகப் பாதிக்கப்பட்ட கடைக்கோடி கடலோரப் பகுதியான சாவித்திரி நகர் மீனவ மக்களுக்கு, புதுச்சேரி பாஜக சார்பில் கள ஆய்வு மேற்கொள்ளப்பட்டு ஒரு மாதத்திற்குத் தேவையான அத்தியாவசிய நிவாரணப் பொருட்கள் வழங்கப்பட்டன.
வங்கக்கடலில் ஏற்பட்ட புயல் சீற்றம் காரணமாக, ஏனாம் சாவித்திரி நகர் மீனவர் குடியிருப்புகளில் பலத்த சேதம் ஏற்பட்டது. பலத்த காற்று மற்றும் மழை காரணமாக பலரது வீடுகள் சேதமடைந்து, படகுகள் மற்றும் மீன்பிடி உபகரணங்கள் பாதிப்புக்குள்ளாகின. இதனால் தங்களது அன்றாட வாழ்வாதாரத்தை இழந்து, உணவிற்கே வழியின்றி தவித்து வந்த மீனவக் குடும்பங்களின் அவலநிலை குறித்து புதுச்சேரி பாஜக தலைமைக்கு தகவல்கள் சென்றன.
இதையடுத்து, பாஜக பிரதிநிதிகள் மற்றும் நிர்வாகிகள் சாவித்திரி நகர் பகுதிக்கு நேரில் விரைந்து சென்று விரிவான கள ஆய்வு மேற்கொண்டனர். புயலால் வீடுகளை இழந்து தவிக்கும் மீனவச் சொந்தங்களை நேரில் சந்தித்து ஆறுதல் கூறிய நிர்வாகிகள், சேத விவரங்களை முழுமையாகக் கேட்டறிந்தனர்.
பாதிக்கப்பட்ட எளிய மீனவக் குடும்பங்களின் வாழ்வாதாரத்தை மீட்டெடுக்கும் வகையில், முதற்கட்டமாக ஒவ்வொரு குடும்பத்திற்கும் தலா ஒரு மாத காலத்திற்குத் தேவையான அத்தியாவசிய சமையல் தானியங்கள், அரிசி, மளிகைப் பொருட்கள் மற்றும் உணவுத் தொகுப்புகளை பாஜகவினர் நேரடியாக வழங்கினர்.
இயற்கைப் பேரிடரால் வாழ்வாதாரம் சிதைந்து தவிக்கும் இப்பகுதி மக்களுக்குத் தேவையான அனைத்து தொடர் உதவிகளையும் முன்னின்று மேற்கொள்வோம் என்றும், அரசு தரப்பிலான கூடுதல் உதவிகள் மற்றும் நிவாரணங்கள் விரைந்து கிடைக்க உரிய வழிவகைகள் செய்யப்படும் என்றும் நிவாரணப் பணிகளில் ஈடுபட்ட நிர்வாகிகள் உறுதியளித்தனர்.
