தட்டாஞ்சாவடி இடைத்தேர்தல்: முதல்வர் ரங்கசாமியை விட இருமடங்கு அதிக வாக்கு வித்தியாசத்தில் அசோக் ஆனந்த் அபார வெற்றி!

புதுச்சேரி, அக். 9: புதுச்சேரி தட்டாஞ்சாவடி தொகுதி இடைத்தேர்தலில் என்.ஆர். காங்கிரஸ் வேட்பாளர் அசோக் ஆனந்த், முதலமைச்சர் என். ரங்கசாமி பொதுத்தேர்தலில் பெற்றதை விட இரண்டு மடங்குக்கும் அதிகமான வாக்கு வித்தியாசத்தில் பிரம்மாண்ட வெற்றி பெற்றுள்ளார்.

புதுச்சேரியில் நடைபெற்ற சட்டசபைப் பொதுத்தேர்தலில் முதல்வர் ரங்கசாமி மங்கலம் மற்றும் தட்டாஞ்சாவடி ஆகிய இரண்டு தொகுதிகளில் போட்டியிட்டு இரட்டை வெற்றியைப் பெற்றார். அதில் தட்டாஞ்சாவடி தொகுதியில் ரங்கசாமி 10,024 வாக்குகள் பெற்று, தன்னை எதிர்த்துப் போட்டியிட்ட வேட்பாளர் விநாயகத்தை (5,583 வாக்குகள்) விட 4,441 வாக்குகள் கூடுதலாகப் பெற்று வென்றார். இதனையடுத்து இரண்டு தொகுதிகளில் வென்றதால் தனது தட்டாஞ்சாவடி சட்டமன்ற உறுப்பினர் பதவியை முதல்வர் ரங்கசாமி முறைப்படி ராஜினாமா செய்தார்.

இதன் காரணமாக அத்தொகுதிக்கு நடைபெற்ற இடைத்தேர்தலில் என்.ஆர். காங்கிரஸ் சார்பில் அசோக் ஆனந்த் களமிறக்கப்பட்டார். இத்தேர்தலில் அசோக் ஆனந்த் மொத்தம் 13,358 வாக்குகள் குவித்து சாதனை படைத்தார். அவரை எதிர்த்துப் போட்டியிட்ட காங்கிரஸ் வேட்பாளர் விநாயகம் 4,876 வாக்குகள் மட்டுமே பெற்றார்.

இதன் மூலம் அசோக் ஆனந்த் 8,482 வாக்குகள் என்ற இமாலய வித்தியாசத்தில் வெற்றிக் கொடி நாட்டியுள்ளார். பொதுத்தேர்தலில் முதல்வர் ரங்கசாமி பெற்ற வாக்கு வித்தியாசமான 4,441-ஐ விட சுமார் இரண்டு மடங்கு கூடுதலான வாக்கு வித்தியாசத்தில் இமாலய வெற்றி பெற்றுள்ளதால், என்.ஆர். காங்கிரஸ் தொண்டர்கள் மற்றும் நிர்வாகிகள் மிகுந்த உற்சாகத்தில் திளைத்து வருகின்றனர்.

English summary: NR Congress candidate Ashok Anand won the Thattanchavady by-election with 13,358 votes against Congress candidate Vinayagam’s 4,876, a margin of 8,482. This is nearly double the 4,441-vote margin Chief Minister N. Rangasamy had in the general election there, before he resigned the seat after also winning Mangalam.