புதுச்சேரியில் 1 லட்சம் பனை விதைகள் நடும் பிரம்மாண்ட திட்டம்: வேல்ராம்பட்டு ஏரிக்கரையில் இயக்குநர் சுரேஷ் ராஜ் தொடக்கம்!
புதுச்சேரி: உலகத் தமிழர்களின் பண்பாட்டு அடையாளமாகவும், நிலத்தடி நீர்மட்டத்தைப் பாதுகாக்கும் இயற்கை அரணாகவும் திகழும் பனை மரங்களைப் புதுச்சேரி முழுவதும் பெருக்கும் நோக்கில், ஒரு லட்சம் பனை விதைகளை நடும் மாபெரும் சுற்றுச்சூழல் திட்டம் வேல்ராம்பட்டு ஏரிக்கரையில் இன்று சிறப்பாகத் தொடங்கியது.
மார்டின் குழுமம் மற்றும் பூரணாங்குப்பம் தனசுந்தராம்பாள் அறக்கட்டளை ஆகியவை இணைந்து இந்த உன்னத பசுமைப் பணியை முன்னெடுத்துள்ளன. தனசுந்தராம்பாள் அறக்கட்டளையின் திரு. பனை ஆனந்தன் தலைமையில் நடைபெற்ற இந்நிகழ்வில், புதுச்சேரி அரசின் செய்தி மற்றும் விளம்பரத்துறை இயக்குநர் திரு. சுரேஷ் ராஜ் சிறப்பு விருந்தினராகக் கலந்துகொண்டு பனை விதைகளை நட்டு திட்டத்தை முறைப்படி தொடங்கி வைத்தார்.
சுற்றுச்சூழல் பாதுகாப்பு மற்றும் நீர்நிலைகளைப் பலப்படுத்தும் இந்த விரிவான திட்டத்தின் முதற்கட்டமாக, புதுச்சேரியின் முக்கிய நீர் ஆதாரமாக விளங்கும் வேல்ராம்பட்டு ஏரிக்கரையில் 4,000 பனை விதைகள் நடப்பட்டு வருகின்றன. ஏரிக்கரைகளின் மண்ணரிப்பைத் தடுத்து பலப்படுத்துவதற்குப் பனை மரங்களின் ஆழமான வேரமைப்பு பெரும் உதவியாக இருக்கும் என்பதால் முதற்கட்டப் பணி இங்கு தொடங்கப்பட்டுள்ளது.
தொடர்ந்து புதுச்சேரி மாநிலத்தின் பல்வேறு ஏரிகள், குளங்கள், கால்வாய்க் கரைகள் மற்றும் கடலோரப் பகுதிகள் என அனைத்து இடங்களிலும் விழிப்புணர்வுடன் இத்திட்டம் விரிவுபடுத்தப்பட உள்ளது. புதுச்சேரி முழுவதும் முழுமையாக 1 லட்சம் பனை விதைகளை நட்டுப் பராமரிக்கும் இந்தத் தொலைநோக்கு முயற்சிக்கு அப்பகுதி மக்களும் சுற்றுச்சூழல் ஆர்வலர்களும் பெரும் வரவேற்பு தெரிவித்துள்ளனர்.
