புதுச்சேரியில் பசும்பொன் முத்துராமலிங்கத் தேவர் குருபூஜை: எம்.எல்.ஏ. டாக்டர் நாராயணசாமி மலர் தூவி மரியாதை!
புதுச்சேரி: விடுதலைப் போராட்ட வீரரும் ஆன்மீகத் தலைவருமான பசும்பொன் உ. முத்துராமலிங்கத் தேவர் அவர்களின் 119-வது ஜெயந்தி விழா மற்றும் 64-வது குருபூஜை விழா புதுச்சேரியில் இன்று எழுச்சியுடன் அனுசரிக்கப்பட்டது. இதையொட்டி உழவர்கரை தொகுதிக்குட்பட்ட பகுதியில் அமைந்துள்ள அன்னாரது திருவுருவச் சிலைக்கு உழவர்கரை தொகுதி சட்டமன்ற உறுப்பினர் டாக்டர் கே. நாராயணசாமி நேரில் சென்று மலர் தூவி மரியாதை செலுத்தினார்.
புதுச்சேரி உழவர்கரை தொகுதிக்குட்பட்ட பாண்டியன் ஹோட்டல் வளாகப் பகுதியில் அமைந்துள்ள பசும்பொன் முத்துராமலிங்கத் தேவர் அவர்களின் திருவுருவச் சிலைக்கு குருபூஜை விழாவை முன்னிட்டு சிறப்பு வழிபாடுகளும் அலங்காரங்களும் செய்யப்பட்டிருந்தன. தொடர்ந்து நடைபெற்ற குருபூஜை நிகழ்வில் சிறப்பு அழைப்பாளராகப் பங்கேற்ற சட்டமன்ற உறுப்பினர் டாக்டர் கே. நாராயணசாமி, தேவர் அவர்களின் திருவுருவச் சிலைக்கு மாலை அணிவித்து, மலர் தூவி வீரவணக்கமும் மரியாதையும் செலுத்தினார்.
அதனைத் தொடர்ந்து, குருபூஜை விழாவில் பங்கேற்ற பொதுமக்கள், சமூக ஆர்வலர்கள் மற்றும் அப்பகுதி மக்களுக்கு சட்டமன்ற உறுப்பினர் டாக்டர் கே. நாராயணசாமி அன்னதானம் வழங்கி சிறப்பித்தார். இந்நிகழ்ச்சியில் தொகுதிக்குட்பட்ட முக்கியப் பிரமுகர்கள், சமுதாயப் பெரியவர்கள் மற்றும் பொதுமக்கள் பலரும் திரளாகக் கலந்துகொண்டு தேவர் திருமகனாரின் திருவுருவச் சிலைக்கு மரியாதை செலுத்தினர்.
தேசபக்தியையும் தெய்வீகத்தையும் தனது இரு கண்களாகக் கொண்டு நாட்டு விடுதலைக்காகவும் சமூக மேம்பாட்டிற்காகவும் அரும்பாடுபட்ட பசும்பொன் முத்துராமலிங்கத் தேவர் அவர்களின் தியாக உணர்வைப் போற்றும் வகையில் ஆண்டுதோறும் புதுச்சேரியின் பல்வேறு பகுதிகளிலும் அவரது ஜெயந்தி விழா மற்றும் குருபூஜை நிகழ்வுகள் வெகு விமரிசையாகக் கடைப்பிடிக்கப்பட்டு வருவது குறிப்பிடத்தக்கது.
English summary: The 119th birth anniversary and 64th Guru Pooja of freedom fighter and spiritual leader Pasumpon U. Muthuramalinga Thevar were observed in Puducherry. Uzhavarkarai MLA Dr. K. Narayanasamy paid floral tribute at the leader’s statue in the Uzhavarkarai constituency and also provided food to the public who attended the event. Local dignitaries, community elders and residents took part.
