புதுச்சேரியில் 17-வது ஜூனியர் கோ-கோ போட்டி: கதிர்காமம் தில்லையாடி வள்ளியம்மை அணி சாம்பியன் பட்டம் வென்று அசத்தல்!
புதுச்சேரி, நவ. 3:
புதுவை மாநில கோ-கோ சங்கம் சார்பில் 17-வது மாநில அளவிலான ஜூனியர் கோ-கோ சாம்பியன்ஷிப் போட்டிகள் கதிர்காமம் அரசு பெண்கள் மேல்நிலைப் பள்ளி வளாகத்தில் சனி மற்றும் ஞாயிற்றுக்கிழமைகளில் உற்சாகமாக நடைபெற்றன. இப்போட்டியில் புதுவையின் பல்வேறு பகுதிகளைச் சேர்ந்த சிறுவர்கள் பிரிவில் 18 அணிகளும், சிறுமியர் பிரிவில் 11 அணிகளும் ஆர்வத்துடன் பங்கேற்று தங்களது திறமைகளை வெளிப்படுத்தின.
விறுவிறுப்பாக நடைபெற்ற சிறுமியர் பிரிவு இறுதிப் போட்டியில், கதிர்காமம் தில்லையாடி வள்ளியம்மை விளையாட்டு கழக அணி அபார ஆட்டத்தை வெளிப்படுத்தி முதலிடம் பிடித்து சாம்பியன் கோப்பையைக் கைப்பற்றியது. தொடர்ந்து வீமன்நகர் என்.ஆர். விளையாட்டு கழகம் 2-ம் இடத்தையும், சேலியமேடு காமராஜர் யூத் கிளப் 3-ம் இடத்தையும், வீமன்நகர் ஜி.என். சரவணன் விளையாட்டு கழகம் 4-ம் இடத்தையும் பிடித்தன.
இதேபோல் விறுவிறுப்பான சிறுவர்கள் பிரிவில், மேல் திருக்காஞ்சி மண்வாசம் இளைஞர் நற்பணி மன்ற அணி அபார வெற்றி பெற்று முதலிடம் பிடித்தது. கதிர்காமம் தில்லையாடி வள்ளியம்மை விளையாட்டு கழகம் 2-ம் இடத்தையும், காமராஜர் யூத் கிளப் 3-ம் இடத்தையும், கதிர்காமம் திலீப் பிரசன்னா விளையாட்டு கழகம் 4-ம் இடத்தையும் தட்டிச் சென்றன.
போட்டிகளைத் தொடர்ந்து நடைபெற்ற பரிசளிப்பு விழாவிற்கு கோ-கோ சங்க செயலாளர் முத்துகிருஷ்ணன் தலைமை தாங்கினார். தலைவர் தனகோடி, துணைத் தலைவர் மலையன் ஆகியோர் முன்னிலை வகித்தனர். சிறப்பு அழைப்பாளர்களாகப் பங்கேற்ற எம்.எஸ்.ஏ நிர்வாகிகள் அழகனந்தம், செந்தில், மோகன்தாஸ் ஆகியோர் வெற்றி பெற்ற வீரர், வீராங்கனைகளுக்கு சாம்பியன் கோப்பைகளையும் பரிசுகளையும் வழங்கிப் பாராட்டினர். முன்னதாக உடற்கல்வி ஆசிரியர் துரை வரவேற்றார். போட்டி ஏற்பாடுகளைப் பொருளாளர் ராம் மோகன் சிறப்பாகச் செய்திருந்தார். முடிவில் துணைத் தலைவர் பரமேஸ்வரி நிகழ்ச்சியைத் தொகுத்து வழங்கினார்.
